Shillong, Risaw 13: U Myntri Rangbah ka Jylla u Conrad K Sangma ha ka sngi Baar ula plie ia ka Meghalayan Age Pavilion ha Ward’s Lake bad ka pynpaw ba kane kadei ka jingshem kaba shisha halor ka Meghalaya kaba wanrah lang ia ka bam, ki tiar kiba la pynmih hi hapoh ka jylla, ki nongsengkam lajong, ki nongthaiñ kti bad ia ka sap ka phong ha ka rukom pynwandur pynwandar.
“Kane ka Pavilion ka ai ia ka jingshem kaba shisha shaphang ka Jylla Meghalaya. Ka wanrah lang hajuh ia kiba bun tylli ki khana kiba batai ia ka jylla. Ka jingiohi jngai ka jong ngi ka dei ban thaw ia ki jaka kiban ym tang ban pynmih ia ki lad khaii pateng hynrei ban rakhe bad ban pyninam ia ka kolshor, ki jingdon jingem kiba naduh hyndai hynthai bad ka jinglong tynrai jong ka Meghalaya” la ong u Sangma.
La plie ia kane ka Pavilion ha ryngkat ka jingdonlang u Myntri ka kam jngohkai u Timothy D Shira, ki heh ophisar sorkar, ki nongsengkam bad ki nongthain kti. Ha kane ka sngi, u Director ka Urban Affairs ula aiti ia kine ki jingtei sha u Chairman bad Managing Director ka Meghalayan Age Limited ban pyniaid bad ruh ban khmih ia ki.
La tei ia kane ka jingtei ha ka jinglut kaba kot T.11.52 Klur ha ka jaka kaba 16,000 sq ft hapoh ka phyllaw jong ka jaka sah u Deputy Commissioner, ia kane ka Pavilion lah ban iohi ia ka jingmih na ka jingshimkhia ka sorkar lyngba ka Creative Redevelopment Plan for Shillong, la ong ki ophisar.
Ia kane ka Plan, la iaroh da ka Ministry of Housing and Urban Affairs kum ka Model jong ka jingtei ha ki jaka rilum, ka jingpyndonkam ia ki jaka ka sorkar na ka bynta ban pyndonkam ki paitbah bad kala ioh ia ka jingiarap lyngba ka Challenge-Based Funding hapoh jongka Special Assistance to States for Capital Investment 2025-26.
Kiwei pat ki project hapoh jong kane ka Plan ki kynthup ban tei biang ia ka Lad ha Anjalee, PWD Complex ha Barik, ka jingpynneh ia ka mariang ha Ward’s Lake, ka Public Park ha ka jaka jong ka Raj Bhavan, ka Street Food Hub ha ka jaka jongka State Guest House bad ka Wah Umkhrah Riverfront Development. Kan don ruh ia ki jaka die jingdie kyrpang kiba la tei ha Brightwell Bungalow, Barik, Laitumkhrah bad Dhankheti.
Kane ka Pavilion kala pyninam halor ki 4 tylli ki bynta — ki jingseng kam kiba ioh jingkyrshan na ka PRIME, Meghalayan Age Shillong Store kaba don ia ki jingthaiñ ia ki tiar bad ki jaiñ, ka Wellness bad Artisanal Products, ka Food bad Hospitality Zone bad ka Fruit Wine Experience Centre.
Ki don 16 ngut ki nongsengkam lyngba ka PRIME kiba la ioh pdiang ia ki shithi ban sdang pyntreikam ha katei ka Pavilion. Ia ka Restaurant lah aiti ha ka nongjop ia ka Hills on a Plate, Adonijah Lyngdoh, katba ia ka Fruit Wine Experience Centre lah aiti sha ka Meghalaya Fruit Wine Makers’ Association.
La pynkut ia kane ka jingplie da ka jingpyninam ia ka jinglum thup ia ki jaiñ ryndia da u Bah Daniel Syiem bad ka jingpynbyrngia na ki kynhun hapoh jong ka Meghalaya Grassroots Music Project.
