Shillong, Risaw 13: U Myntri Rangbah ka jylla Conrad K Sangma u la ong ba ka jingiap jong iwei i khyllung ha West Khasi Hills ka long kaba sngewsih hynrei u la ban jur ba ym dei ban kynnoh salonsar ia ka jingbym lah ka tnad ka koit ka khiah ban ai jinshakri iaki longkmie tang na kawei ka jingjia.
“Ki don beit ki jingjia kiba jia, kiba sngewsih bad kim dei ban jia. Ngan ym lah ban batai bniah halor kane namar ngam don ki jingtip ki ba bniah halor kane” la ong u Conrad.
U Conrad ula ong ba ka sorkar ka trei ban iada iaka jingim briew namar kata ym lah ban pyniadei ia kawei ka jingjia bad ka jingtrei ka tnat ka koit ka khiah bad hynrei dei ban pdiang ia ka jingktah bad ki prokram jong ka.
“Man la ka bynta ka long kaba kongsan, man la ka jingim ka long kaba kongsan bad hap ban iada iaka jingim briew. Hynrei ngin sa klet iaka ba shakhmat lada duh ngi bishar bniah ia ka jingtreikam jong baroh kawei ka tnat halor kawei ka jingjia” u la ong.
U myntri rangbah ka jylla u la ong ba da ki hajar ngut ki jingim la lah ban iada lyngba ka early childhood development bad CM Safe Motherhood programme.
“Mynta ka sngi, palat shi lak sien kala don ka jingleit phah sumar ki longkmie lyngba ka jjngbei tyngka da ka Sorkar Meghalaya, ki longkmie ba armet kim donkam ban siew ei ei na ka bynta ka jingleit phah sumar kiba pyndonkam iaka Mother App. Kane kala iada ia bun ngut ki jingim” u la ong.
U la ong ba palat 200 tylli ki safe motherhood transit homes ki treikam naka bynta ki longkmie ba armet ban buddien iaka koit ka khiah jong ki daka ba pynbiang kali bad pisa naka bynta ka leit ka wan bad ban sumar.
“Namar kita ki jingpyrshang, ha kine ki 4-5 snem ka jingiap ki longkmie ba kha khun ka la hiar da 57 percent. Kane ka la wan na ka ophis jong u Myntri Rangbahduh ka ri India. Ka Meghalaya model ka dei kaei kaei kaba ka ri ka dang pule bniah” ula ong.
“Hoid, kam dei kaba treikam kaba janai. Ngi don shisha katto katne ki jingjia kiba jia. Hato ka dei ban jia? Kam dei ban jia. Ka thong jong nga kam dei ban pynduna hynrei ban pynduh jait syndon ia kano kano ka jingdin ba khlad khunlung ne longkmie. Haba ka kmie ka wanrah ia ka jingim ha kane ka pyrthei, balei ngi dei ban duh ia ka jingim jong ka kmie,” u la ong.
Halor ka jingpyniasoh ia ki surok, u Myntri Rangbah u la ong ba la shna bun bha ki surok ha ki 7-8 snem ba la dep, kaba kham bun ban ia ki 25 snem lada khein kyllum lang, hynrei ki jingeh ki dang don.
“Ngim lah ban shna ia baroh ki surok ha ka shisien shna. Ki don shibun ki jingeh hynrei ngi don ha ka lynti kaba dei, kiei kiei kin sa nang kiew. Hangno hangno ba don ki jingeh, ngin trei khambha ban weng ia kita ki jingeh,” u la bynrap.
