Shillong, Risaw 13 : Ka kynhun Myntri ka Sorkar Jylla ha ka sngi Ba-ar, kala ai jingmynjur iaka jingtyrwa ban pynkylla ia ki kyndon jong ka Meghalaya Cooperative Society Act, 2015.
U Myntri Rangbah Conrad K Sangma ula ong ba kane ka jingpynkylla ka kynthup ia ka jingpynkylla ia kawei ka kyntien ha ka kyndon 21 (1) jong ka Act, na ka “registered post” sha ka “speed post”.
Ula ong ba kane ka sienjam ka dei kaba la leh halor ka jingbthah na ka Sorkar Pdeng. ‘Ka Tnad Postal, ka Sorkar India kala bthah ia baroh ki Sorkar jylla ba kin pynkylla ia kane ka kyntien na ka Act. Ka ‘Registered Post’ ka dei ka rukom kaba rim, katba ka ‘Speed Post’ ka dei ka rukom kaba thymmai,” u la ong.
Ka Kynhun Myntri kala ai jingmynjur ruh ia ka thup jong ki sngi shuti ka Sorkar na ka bynta u 2027, kaba u Myntri Rangbah ula ong ba kam shym la don jingkylla na kaei kaba long mynshemsnem.
