Shillong, Risaw 12 : Ka All Jaintia Muster Roll Workers & Labour Union kala ai jingiaroh ia u Myntri Rangbah Conrad K Sangma namar ka jingkyntiew ia ka rta ban pynkut ia ka jingshakri jong ki nongtrei muster roll na ka 58 sha ka 60 snem, haba kyntu ia ka Sorkar ban pynthikna ba ka hukum kan ai jingmyntoi lang ia kito kiba shah ktah ha ka jingpynbna ba mynshem snem.
Ha ka dorkhas sha u Myntri Rangbah ha ka sngi Nyngkong, ka Union kala ong ba ka rai jong ka Kynhun Myntri ba 15 tarik Nailur, 2026 kala ai ia ka jingkyrmen ba thymmai sha ki hajar tylli ki longiing kiba shaniah ha ki kam muster roll.
“Ka jingshimkhia jong phi halor ki mat kiba ïadei bad ka tulop, ka rta shongthait, ka shuti haba armet bad ki jingmyntoi, ka Employees’ Provident Fund (EPF) bad kiwei ki lad jingïarap ïa ki nongtrei kiba la pyntreikam lyngba ka Building and Other Construction Workers’ Welfare Board hapoh ka Tnad Labour, ka la wanrah biang ïa ka jingkyrmen, jingpynshlur bad jingshaniah ha ki hajar ngut ki nongtrei bad ki khun jong ki,” ong ka union ha ka dorkhas.
Ka la bynrap, “Ngi pynpaw ïa ka jingsngewnguh kaba khraw halor ka jingbuh ïa ka 60 snem kum ka rta ban pynkut ïa ka jingshakri jong ki nongtrei Muster Roll. Kane ka pynthikna ïa ka jingïoh kamai jakpoh bad ka burom jong ki nongtrei jong ngi ha ki snem ba khatduh jong ka jingim.”
Ka seng ka la pynpaw ïa ka jingsngewkhia halor ka jingpynbna jong ka Personnel & AR (B) Department, Notification No. PER(SR)33/2009/13, kaba la pynmih ha ka 25 tarik Nailur, 2025, kaba weng noh ïa ka hukum kaba mynshwa ba ailad ïa ki nongtrei ban bteng ïa ka jingshakri haduh 65 snem ka rta. Ka seng ka la ong ba kane ka la wanrah ïa ka jingbym shai bad ka la pynlong ïa katto katne ngut ki nongtrei ban hap shongthait shwa ïa ka por.
Ka dawa ba ka jingbuh ïa ka 60 snem kum ka rta ban pynkut ïa ka jingshakri dei ban pyntreikam naduh ka 25 tarik Nailur, 2025, bad ba ïa kito kiba la shap shongthait shwa ïa ka por hadien katei ka jingpynbna dei ban wanrah biang sha ka kam haduh ba kin dap pura 60 snem ka rta.
“Ka rta ban pynkut ïa ka jingshakri ka dei ban treikam naduh ka 25 tarik Nailur, 2025, kata ka tarik kaba u Commissioner & Secretary jong ka Personnel & AR (B) Department u la pynmih ïa ka jingpynbna ban weng noh ïa ka hukum ba mynshwa. Ka Sorkar ka dei ban isynei bad ailad ïa kito kiba la hap shongthait shwa ïa ka por hadien katei ka jingpynbna, ba kin sdang biang ïa ka jingshakri haduh ba kin dap pura 60 snem ka rta,” ong ka seng.
Ka seng ka la kyrpad ruh ïa u Myntri Rangbah ban bthah ïa baroh ki tnad Sorkar ban pynsted ïa ka jingpynrung ïa ki nongtrei hapoh ka Employees’ Provident Funds and Miscellaneous Provisions Act, 1952, khnang ba kin ïoh ïa ka jingïada bad ki jingmyntoi jong ka EPF.
Nalor kata, ka la dawa ban thaw ïa ka Muster Roll Workers Welfare Boards kaba kyrpang ha baroh ki tnad treikam kiba ïadei bad ki kam techical bad kiwei ki kam shabar ka ban long kat kum rukom treikam jong ka BOCWB, ym tang ha ka PWD bad PHE.
Ka seng ka la ai jingmut ruh ba dei ban pynkynriah ïa ka jingpeit bad jingkhmih ïa ki nongtrei Muster Roll na ka Personnel & AR (B) Department sha ka Labour Department, khnang ban pynsted ïa ka jingpyntreikam bad ka jingpynpoi ïa ki jingmyntoi sha ki nongtrei.
