Shillong, Risaw 12 : Ka Khun Hynniewtrep National Awakening Movement (KHNAM) kala kynnoh ia ka jingbym don ka rukom treikam kaba shai ha ka jingpyniaid ia ki painkhana paidbah bad ki jaka pynieng kali hapoh ka Meghalaya Urban Development Authority (MUDA) bad dawa ban shim mardor ia ki lynti ban pynbeit.
Ha ka dorkhas sha u Chairman/Secretary ka MUDA, u Working President ka KHNAM Bah Thomas Passah ula ong ba ki jingshem lyngba ka RTI ki pynpaw ba ki tender na ka bynta ki lai tylli ki painkhana paidbah ym shym la plie wat hadien shisngi ba pynlait ia ka NIT.
“Ka Notice Inviting Tender ban pyniaid ia ki lai tylli ki painkhana paidbah ba don ha Pahsyntiew Shopping Complex & Parking Lot, Khlieh Iewduh Parking Lot & Khyndai Bah Ryntieh Police Bazaar Shopping Complex cum Parkiang Lot la pynmih da ka Tnad la jan shisnem, ki nongthep tender kila aiti ia ki kot ki sla tender, hynrei ia kine ki kot ym shym la plie satia haduh mynta bad ia kine ki painkhana la pyniaid hi da ka Tnad” ong u Bah Passah.
U ong ba ki nongthep tender kila pynlut pisa ban thied ia ki court fee stamp bad ki kot tender hynrei ia ki tender ym shym la plie satia, katba ia ki painkhana la pyniaid da ki briew ki bym dei ki nongtrei ka MUDA, kaba pynmih ia ka jingartatien halor ka jingtreikam kaba shai.
“La pyntip ba ka dur bala oh da ki brirew kiba pyniaid ia kine ki painkhana ka long palat ban ia ka dor bala buh da ka MUDA, kaba iasyriem kum ka jinglum pisa jubor” bynrap ka dorkhas.
Halor ki parking lot, ka KHNAM kala buh jingkylli ia ka jingai wai ia ka Garikhana Parking sha ka Kong Heevalina Kharraswai bad kdew ia ka clause 4 jong ka kyndon ai kam kaba ong “Ki nongthong ba heh dor eh ki lah ban nym dei eh kiba jop ha ka jingiathong. Ha ki kam bym ju jia koit ia kiba thong heh yn ym pdiang satia hynrei yn pyrkhat tang ia ki tender kiba kham bha bad ba don jingkitkhlieh”.
“Ka rukom ai pyniaid ia ki Parking lot paidbah ha kylleng ka Ri, ka ju long beit ia kiba thep heh dor duh hadien ba kila pyndep ia ka jingbishar technical” ula ong, haba dawa ban ai ia ka kam sha ki nongthong kiba heh dor duh hapoh ki kyndon ain kiba pyrrkhing.
Ka KHNAM kala kynnoh ruh ba ki artylli ki parking lot ha Khlieh Iewduh bad Khyndailad la pyniaid hi da ka Tnad halor ka nongrim ba dang iaid ka jingtei pynbha.
“Watla lada don ka jingtei pynbha ia kano kano ka parking lot, kam ym long satia kaba eh ban khein ia ka jingngiam jong ki kali. Nalor kane, u nongiohkam u hap shim ia ka jingkitkhlieh ban leit khmih ia ki jaka pynieng kali bad khein jingkhein hi ia ka dor ba u tyrwa” ong ka KHNAM.
Kala ai jingmut ba ia ka NIT dei ban pynmih bad ia ka contract dei ban ai lyngba ka jingkhot tender kaba shai, ka ban long ruh ka jingaikam aijam ia ki samla.
