Shillong, Risaw 12 : Ha ka por ba kyrdan jong ka NEHU kala hiar na ka 15 sha ka 151-200 band hapoh ka Ri, ki seng ki samla pule kila kyntu ia u Lat ka Jylla Ch Vijayashankar ban ioh noh ia u Vice Chancellor ba pura, uba tip bha shaphang ka University.
Ha ka dorkhas ba iasoi lang hapdeng ka NEHUSU bad KSU-NEHU, kila ong ba ka NEHU kaba la seng hapoh ka Act 1973 na ka bynta ka thain Shatei Lam Mihngi, ka don ia ka nam bad ka sap ban khie im hynrei ka duna ha ka jingdon ki nongialam kiba skhem bad kiba don jingkitkhlieh.
Haba pynkynmaw ia ka jingiashah thngan ba khlem pud da ki samla pule ha u Naiwieng 2024 halor ka rukom treikam ki borkhmih, ka jingthungkam bad ki jingdonkam ba man ka sngi jong ki samla pule, kine ki seng kila ong ba ki jingeh ba iai jia ha ka synshar khadar, ki jingdonkam bad ka jingdon ki nongtrei hapoh ki VC bala leit noh, kala ktah jur ia ka jaka pule.
Kila kdew ia ka kyrdan NIRG : 15 ha u 2016 sha ka 151-600 ha u 2025, haba kdew ia ka jingkylla kaba pher bak ly bak bad ba donkam ban hap iapyrkhat.
Kine ki seng kila maham ruh ba ki jingpynkylla ba thymmai ha ka rukom treikam hapoh ka NEP-FYUP, ITEP bad ka One-Year PG- la shu kyntur khlem ki kamra shim klas, ki nonghikai bad ki jingdonkam baroh.
Kaei kaba ka NEHU ka donkam mynta, ki ong, ia u VC ba don ia ka kyrdan pule kaba biang, ka sap pyniaid kam kaba la pyni nuksa, ka jinglong ba janai, ka jingiohi jngai bad ka jingkut jingmuthok ban pynkhlain ia ka jaka pule” bad kiba tip bha shaphang ka NEHU bad ka jinglong ka thain Shatei Lam Mihngi.
