Shillong, Risaw 10: U Myntri ka Sorkar bad MLA ka South Shillong Bah Sanbor Shullai, ha ka sngi Saitjain ula plie paitbah ia ka Cultural Complex kaba thymmai jong ka Seng Khasi Ri Raid Laban ha Upper Kenches Trace – Lumshatsngi.
Ha kane ka jingialang la iadonlang u Secretary ka NEC Satindra Kumar Bhalla kum u Symbud Kongsan, u President ka Seng Khasi Seng Kmie Rangbah O Pyngrope, u Bah Ioster Sun President ka Seng Khasi Ri Raid Laban, ki Rangbah Shnong na ki shnong bapher bapher, ki paid riewngeit kiba dang bat ia ka niam tynrai bad kiwei kiwei.
Ia kane ka Cultural Centre la tei ha ka jinglut kaba kot T.9 Klur tam ia kaba la bei tyngka da ka North Eastern Council.
Haba kren ha kane ka sngi, u Bah Sanbor ula ong, hapoh ka shnong Laban ki kynhun niam bapher bapher ki don ia la ka jong ka jaka kyntang ban pynlong jingduwai lane ban shong pyrkhat kam, hynrei tang ka Seng Khasi Ri Raid Laban kaba dei ka seng trai ri kam don satia ïa la ka jaka ban pynlong ïa ka nguh ka dem bad ka duwai ka phirad.
Halor katei ka jinglong jingman, kala pynlong ïa u ban sngewkhia bad ban shimkhia ryngkat bad ki katto katne ki Rangbah jong ka Seng Khasi kila sdang ban wad ïa ka jaka naduh u snem 1996-1997 bad la ïoh ïa ka jaka kaba heh kumba 35,000 Sqr ft bad ula pynpaw ruh ia ka jingsngew nguh ïa ki riew rangbah kiba la don bynta ha ka por ba ki ïaleh ban wad ïa ka jaka bad ban ïoh tei ïa katei ka jaka kumba ka long mynta.
Ha kane ka sngi u Bah Sanbor ula aiti ïa ki kot dulir jaka lem bad ia u shabi jong ïing seng ba thymmai sha ki nongialam jongka Seng Khasi Ri Raid Laban.
Ki nongialam ka Seng Khasi Ri Raid Laban kila pynkup burom da ka jaiñspong ia u Bah Sanbor Shullai ryngkat bad ka pynphong ia ka jain ryndia bad katba ki dang pynspong ia u Bah Sanbor la sakhi ba u Bah Sanbor ula jaw ummat kaba long ka dak jong ka jingkmen ban ula lah ban pynurlong ia ka jingangnud jong kiba dang bat ia ka niam tynrai.
