Shillong, Risaw 09: U Myntri ka tnad pule puthi Bah Lahkmen Rymbui ula ban jur iaka jingdonkam ban pynlong ia ki kamra klas kiba kham im bad kham sngewtynnad, da kaba ban jur ba ka pule puthi ka dei ban iaid palat ia ka jinglah lehbha ha ka jingpule.
“Ki kamra klas ki dei ban long kiba kham im bad kham sngewtynnad ban ailad ïa ki khynnah skul ba kin lap bad pynroi iaki sap jong ki nalor ka jingpule” ong u Rymbui.
“Ka jinghikai ka dei ban pyniar shabar jong ki kot pule daka ba kynthup iaka skills development bad practical, kaban pynlah ia ki khynnah skul ban bud ia ki jingsngewtynnad jong ki bad ban pynkhreh ia ki kabu hadien habud” ula ong.
U Bah Lahkmen ula kren ia kane ha ka seminar on “Implementation of the National Education Policy (NEP) 2020: Issues, Challenges and Way Forward, ba la pynlong da ka Directorate of Educational Research and Training (DERT) ha Shillong.
Haba pynpaw ïa ki jingeh ha ka jingpyntreikam ha Meghalaya, u Myntri u la kdew ïa ka jingïasam ïa ki jingtip hapdeng ki bor pyniaid skul bapher bapher, ki jingeh ha ka ktien, ka jingduna ki nonghikai, ka jingshaniah private coaching bad ka jingpynïasoh lang bad ka teknoloji.
Haba iadei bad ka Three Language Policy, u Myntri ula ong ba ka jingbun jait ki ktien jong ka Meghalaya bad ka jingbym iaryngkat jong ka jingdon ki nonghikai ha kylleng ka buh jingeh.
U la ban jur ia ka jingai jinghikai pyntbit iaki nonghikai bad ban pynthikna ba kum kine ki prokram kin pynkylla iaki rukom treikam ha ki kamra klas.
Halor ka teknoloji, u Bah Lahkmen Rymbui u la ban jur ïa ka jingpyndonkam hok lyngba ki lad jingïarap naki kor digital kiba biang ban ïarap ïa ki skul ban pynbha ïa ka jingpule.
U la kubur ia ka jingduna ha ki lad jingiarap, ka jingduna ha ka jingdon ki jingtei bad ka jingduna ki nonghikai, bad u la kyntu ia ki nongshim bynta ban iatreilang.
U Commissioner bad Secretary ka tnad Pule Puthi, u Vijay Kumar Mantri u la pynpaw ïa ka jingkiew jong ka jylla ha ka pule puthi haka foundational-stage education, formative assessment, experiential learning bad competency-based education da kaba ong ba ka jingpyntreikam kaba paka kadei ban long ka mat ba kongsan.
