Shillong, Risaw 09 : U Symbud Myntri Rangbah bad President ka NPP-Meghalaya Bah Prestone Tynsong ula pyndonkam ia ka Phawar u Aesop jong u myrsiang bad ki soh grape ban ther kylla ia ki Liang Pyrshah, haba ialap elekshon na ka bynta u Dr DRL Nonglait sha ka elekshon shiteng samoi ka Shillong Lok Sabha.
Haba kren ha ka jingialang bala pynlong da ka NPP Mylliem Block, u Bah Prestone ula ong ba ki nongkynthoh pyrshah ia ka Sorkar ba ialam u Conrad K Sangma kila ialam bakla ia ki paidbah kum u myrsiang ha ka Phawar u Aesop.
“Kane ka phawar ka pynkynmaw ia nga ha ka por ba Nga dang don ha skul, ha ka por ba nga pule ia ka Phawar u Aesop” ong u Bah Prestone.
“Nga kynmaw ia kawei ka lynnong kaba u myrsiang ula pyrta iala ki para myrsiang bad kiwei ki mrad khlaw-“paralok, phet na uto u diengsoh namar lada phi bam phin pynhiar bad phi lah ruh ban siep ka kpoh, ta ka daw ngi dei ban phet jngai na u. ‘kumta baroh kito kiba biej bad ngop kila phet noh mardor” ula ong.
“Hadien ba la iaphet lut baroh, ujuh u myrsiang, tang marwei, ula iaid suki suki bad bam lut ia u soh grape. Ha ka step kaba bud haba ki para mrad ki iaid lynti na kajuh ka jaka, kila lap ba ym don shuh wat tang uwei u soh grape ha u dieng. Une u myrsiang ula ong biang ‘ Oh, nga bakla. Hadien ba nga mad katno u jew, Nga dang ap ba un mih soh biang, haduh mynta ym pat mih soh satia” ong u Bah Prestone.
Haba batai ia ka jingmut, u Bah Prestone ula ong “Kaei kaba nga mut ban ong ka long ba baroh kito ki mat ba la iakren-da ki khmat briew ngi iohi kiei ki kam kiba ka Sorkar kala pyrshang ban leh hapoh ka jingialam u Conrad K Sangma-don kiba ong ba ka dei tang ka jingpynsyrwa kai. Don kiba ong na Umshyrpi haduh Baniun, la sngew kumba niah kulai ha ka surok ba sniew. Hadien ki sdang ban kdew ia ka dur u Bah Prestone, ka dur u Conrad, ka dur u bah Sniawbha ban ong ba u soh grape u jew”.
“Bad kaba phylla ka long ba bun ki ngeit ia ka. Kumta, nga kwah ban ong, ko ki Kmie, Kpa, Khynnah rit, sngewbha bishar bha jai” ula bynrap.
U Symbud Myntri Rangbah ula kdew ruh sha u samla nongiathuh khana ba kyrtang u Akbar na Mylliem.
“Une u samla Akbar, ki khana jong u kila rung ha ka dohnud bad ka jingmut jingpyrkhat. Nga khot ia u da u Akbar the Great. Ka khubpr ba une u samla u ai ka lah ban pynkylla ia ka jingmut jingpyrkhat jong ki paidbah ka Jylla jong ngi bad ka Jaidbynriew jong ngi” ong u Bah Prestone.
Ia kane ka jingialang ha Mylliem la pynlong ban pan ia ka jingkyrshan na ka bynta u kyrtong ka NPP Dr DRL Nonglait u ban iakhun ia ka elekshon shiteng samoi ka Shillong Lok Sabha.
