Nongstoin, Risaw 08 : Ka seng HNYM-West Khasi Hills, ha ka sngi Palei, kala aipor shibnai ia ka Sorkar Jylla ba kan pynpoi noh ia ki marbam rashon sha ki paidbah ka West Khasi Hills, kiba la duh ia ka rashon mynta la jan lai bnai.
Ka HNYM hapoh ka jingialam u President Tailan Lyngkhoi, kala leit iakynduh ia ki bor pyniaid district ban iakren halor kane ka kam.
U Bah Tailan ula iathuh ba la lai bnai ki paidbah ka District kila ud la nam halor ka jingbym ioh shuh ia ki marbam rashon jong ka Sorkar.
U iathuh ba ha ka jingwad jingtip na ki bor pyniaid ia ka kam, la iathuh ba ka daw ka dei namar ka shnong Pyndengrei kam shah shuh ban wan pynhap ia u khaw rashon da ki trok 10 lane 12 shaka sha ka kudam ka FCI kaba don ha ka shnong.
Hynrei ula ong ba ka HNYM kala rai ban aipor shibnai naduh mynta ka sngi ia ki bor district ba kin shimkhia ha kaban pyn beit kloi noh ia kane ka kam. Ula ong ba lada ki paidbah ka district ki dang duh ia ki marbam rashon, ka seng kam banse ban wer paidbah ban iakhih pyrshah tad haduh ban da ioh ia ka hok.
“Ka long kaba pynlyngngoh ia baroh ki paidbah ba lada ka Shnong Pyndengrei kam shah shuh mynta ia kine ki trok 10-12 shaka balei naduh ki por mynshwa pat ki shah. Lah da ki snem ki kali kit khaw rashon ki iaid beit ha katei ka shnong Pyndengrei, hynrei mynta kyndit pat ki bor pyniaid ophis jong ka tnad supply, ki la pynshai ba kim shah shuh na ka liang ka shnong” ula ong.
Ula ong ruh ba lehse kawei pat ka daw kumba la iohi lyngba ki lad pathai khubor ha kine ki bnai ba la dep, ka dei halor ka jingshah shim pisa 2500 kawei ka trok.
“Ngi la iohi ruh lyngba ki lad pathai khubor ba lyngba ka jingialam jong u Bah Mosklander Marngar President jong ka seng ki nongniah trok, ha kaba ki la leit ban iakren hangtei ha FCI namar ka jingshim pisa 2500 kawei ka trok khlem kino kino ki receipt. Lehse kane ruh ka lah ban dei kawei na ki daw ban pynsangeh noh ia kine ki trok ban leit buh ia u khaw rashon” ula ong.
“Hynrei ban ialehkai ia kaei kaei kaba dei hok ka bhah jong ki paidbah, ka long ka bym dei ne ka bym lah satia ban pdiang. Kum ki paidbah ngim lah ban pdiang ia kaba kum kane. Nang ialehkai phi kiba heh ba hain nang iap pat ki paidbah hynrei nang iap pat ki paidbah ka long ka bym long”.
