Shillong, Risaw 8: Ka sorkar kan ym leh kyrkieh ban pynkynriah ia ki nongdie madan hynrei ka dang peit ia ki jaka kiba biang ban buh ia ki jaka shongdie jingdie kaba kin leh ia ka kam khaii pateng kaba bha, ong u Symbud Myntri Rangbah ka Jylla uba khmih ia ka Urban Affairs u Bah Sniawbhalang Dhar hynne ka sngi Palei.
“Ngi ngim duh mynsiem, ngi trei na ka bynta jongki paitbah. Ngan ym ong ia phi, ia kaei kaba ngan leh, hynrei ngan leh ia kaei kaba kongsan” ong u Bah Dhar ia ki lad pathai khubor.
Ula ong ba ka jingpynriah ia ki nongdie ha Khyndai Lad bad Laitumkhrah kadei kaba la lah ban pyndep hynrei kino kino ki sienjam yn sa shim tang hadien ba lah dep ban ithuh ia ka jaka kaba biang ban buh ia ki nongdie madan.
“Kidei hi ki shynrang bad kynthei ki jong ngi, ngim lah ban shu bret ia ki” la bynrap u Bah Dhar.
Ha kaba iadei bad ka jingpynslem, ula ong “Ka daw jong ka jingslem kadei namar ba nga hap ban buh ia ki ha ka jaka kaba dei, kidei ki briew ki jong ngi, ngim lah ban shu bret ia ki harud surok.”
U Bah Dhar ula ong, ba ka sorkar ka thmu ban pyntreikam ia kajuh ka “Model” kaba la leh ha Khyndai Lad bad Laitumkhrah ha kiwei ki jaka kum ha GS Road.
“Ki don bun ki jaka, ngim pat pynthikna pura, namar ba ngi dang peit la kan long kaba bit ba biang ban khaii pateng” ula bynrap.
Ha kaba iadei bad ka jingslem jong ka Iew Polo, u Symbud Myntri Rangbah ula ong, ba lah dep ban aiti.
“Ngi lah dep ban aiti. Nga lah klet mano, hynrei ngi lah leh ha ka lynti kaba khuid ba suba. Ngi lah dep pynthikna bad ula pyntip ban siew T.50 shi square feet. Kadei ka dor kaba biang bha. Ia mynta hi lah iasoi ia ka jingiatehkular, nga dang shu dep ban ai mynjur ia ki kot ki sla bad yn sa leh ia kaba donkam” ong u Bah Dhar.
