Pasighat, Risaw 7: Ka jingim ba man ka sngi ka la thut ha kylleng ka East Siang district jong ka Arunachal Pradesh ha ka sngi Balang namar ba khyndai tylli ki kynhun samla pule bad ki la pynlong ia ka pakhang shnong ba 12 kynta namar ka jingduna nonghikai ha ki skul sorkar.
Kane ka pakhang shnong ka la sdang naduh ka por 5 baje mynstep bad kan bteng haduh ka por 5 baje janmiet.Ia kane la ialam da ka Legong Banggo Students’ Union (LBSU).Ki dukan ki khang lut, katba ki kali paidbah bad ki kali shimet ki dang sahkut ha ki surok. Ka Pasighat bad kiwei kiwei ki jaka pdeng jong ki distrik ki kynjah beit slam slam.
Ka jingpynmih mardor ka dei ka rai jong ka sorkar ban pynkynriah noh ïa ki 63 ngut ki nonghikai na East Siang.Ki nongiakhih ki ong ba katei ka jingleh kan nang pynsniew shuh shuh ia ka jingduna nongtrei ha ki skul sorkar.
“Ka jingpynkynriah ïa ki 63 ngut ki nonghikai na kawei ka distrik ha kaba ki skul ki la duna bha ki nongtrei kam don jingmut ei ei ha ka liang ka synshar khadar,” ong u nongmih khmat jong ka LBSU.
Ki kynhun ki la dawa ban pynsangeh noh mardor ïa ki hukum pynkynriah kam, ban pynsted ïa ka jingpynrung kam ban pyndap ïa ki kam kiba lait bad ban bishar bniah ïa ka jingïapher hapdeng ki nonghikai bad ki khynnah skul shwa ban pynkynriah kam shuh.
Ki nongpyniaid ki la maham ruh ba kin don ki jingiakhih kiba kham jur lada ym lah ban pynbeit ia ki jingdawa jong ki.
