Shillong, Risaw 07 : Da ka jingiai bteng ka Meghalaya ban pyntip ia ka jingnang bun ki nongpang HIV, u Myntri ka Koit ka Khiah Bah Wailadmiki Shylla ha ka sngi Balang ula ong ba ka Sorkar kala pynleit jingmut pura halor ki jingialap ban pynsngewthuh paidbah bad ban pynkhlain ia ki lad ai jingsumar.
Haba kubur ba u khlem pat iohi ia ka jingkhein ba khatduh, u Bah Wailad ula ong “Ia mynta ngam pat ioh ban peit. Ngam pat pan satia ia ki jingkhein ia mynta, namar ngi la pynleit jingmut pura halor ka jingpynsngewthuh paidbah”.
“Ngi lapynkhreh namar ha ka sien ba khatduh, kumba la nga la pyntip teng, ka Sorkar kala mynjur ia ka plan ba san snem” ula ong.
“Mynta ngi la ioh ia ka jingmynjur na ka Kynhun Myntri bad ka jingmang pisa bad kiwei kiwei, kumta ngi la don ha ka kam ban thung shuh shuh ia ki briew bad ban plie kham bun ki ART centre kaba ki briew ki lah ban wan ban ioh jingsumar” ula bynrap.
U Bah Wailad ula ong ba ki awareness drive bala sdang kham hashuwa, kila sdang ban pyni ia u soh.
“Dang shen ngi la sdang ia ka awareness programme. Nga kmen ba hadien bala pynlait ia ka, shibun ki kam kila jia” ula ong.
“Wat mynta ngi la pynkhreh na ka bynta ka Youth Festival ka ban sa pynlong da ka MACS ban pynthikna ba bun ki briew kin wan bad iasnohkti lang bad ngi ban iakhun pyrshah ia ka HIV” ong u Myntri.
