Shillong, Risaw 06 : U Myntri Rangbah bad National President ka NPP Conrad K Sangma ha ka sngi Ba-ar, ula kubur ba ka party ka “sngewsih jur” hadien ba ka jingdon MLA kala hiar sha ka Nod ha Nagaland namar ka jingleit iasoh ki MLA sha ka NPF hynrei ula pynpaw ba ka NPP kan sa wan phai kham khlain shuh shuh ha ka Jylla bad ha kylleng ki Jylla ka thain Shatei Lam Mihngi.
“Kane ka dei shibynta jong ka sain pyrthei. Ngi la iohi bunsien ha kylleng ki jaka jong ka Ri bad ha ka thain Shatei Lam Mihngi. Kam dei kaei kaei ka bym pat ju jia mynno mynno ruh. Hato ngi kmen ia kane? Ngim kmen satia ia ka. Ngi sngewsih jur ia kaei kaba jia hynrei ngi pdiang ba ha ka sain pyrthei ngi hap ban mad ia kum kine ki jingjia” ong u Conrad.
“Ngi la iohi ba ka jia ha Arunachal Pradesh hashuwa bad ha Nagaland ruh kumjuh” ula bynrap.
Haba ai ka khubor sha ki nongtrei ka party, une u khliehduh ka NPP ula ong ba ha kum kine ki por kiba eh dei ban pynkhlain ia ka jingkut jingmut.
“Ai ba ngan kren da kaba shai sha ki nongkitkam ka party, ki nongialam ka party jong ngi, bad sha baroh ki nongkyrshan ba wat hapdeng kine ki por kiba heh ngi dei ban ialong kawei bad ngi hap ban iatreilang bad kane ka jinglong jingman ka dei ban pynkhlain ia ka jingaiti sha ka party bad ka jingngeit ia kaei kaba ngi la tei baroh shikatta” ula ong.
“Kane ka jinglong jingman ka dei ban pynthikna ba ngin wan phai kham khlain shuh shuh namar kine ki jingeh bad ngim dei ban ailad ia kum kine ki jingjia ban pynduh mynsiem ia ngi. Ka NPP kan iaid shakhmat, ngin sa wanphai kham khlain shuh shuh ym tang ha Nagaland hynrei ha ka thain Shatei Lam Mihngi baroh kawei” ula pynpaw.
Haba ban jur ba ka NPP kan iai long shibynta jong ka NDA, u Conrad ula ong ba ka party kan iai bteng ban kyrshan ia ka Sorkar NDA ha ka thain bad kdew ia ka Meghalaya kum ka nuksa ha kaba kala ai jaka lem iala ki jong ki paralok.
