Kohima, Risaw 5: Ka National People’s Party (NPP) ha ka sngi Nyngkong ka la mudui da ka disqualification petitions hakhmat u Lamphang ka Ïingdorbar Thaw Aiñ ka Jylla Nagaland pyrshah ïa ki san ngut ki MLA jong ka kiba dang shu pynïasoh bad ka Naga People’s Front (NPF).
Ha ka kyrwoh ba la pyllait ha ka 5 tarik u Risaw, u National Vice President ka NPP u Vevoyi Wideo u la ong ba la ujor pyrshah ïa uwei pa uwei na ki 5 ngut ki nongthaw aiñ katkum ka Tenth Schedule jong ka riti synshar ka ri, kaba ïadei bad ka jingphet seng da ki nongmih khmat ba la shah jied da u paidbah.
“Ngi burom ia ka kam riti synshar jong ka ophis u Lamphang bad ngin buh ia ka case jong ngi ha khmat jong u katkum ka ain”, la ong u Wideo.
Ka jingmudui ka wan hadien ka rai jong ki MLA ban ieh noh ia ka NPP bad ban pyniasoh bad ka NPF.Kine ki san ngut ki MLA ki kynthup ia u— A Nyamnyei Konyak, Nuklutoshi, C Kipili Sangtam, Dr Tseilhoutuo Rhutso bad u Benei M Lamthiu — kiba la pyniasoh sha ka NPF ha ka shi tarik u Risaw.Hadien kata u Lamphang ka Ïing Dorbar Nagaland u la ithuh ïa ka jingïasoh jong ki bad ka NPF katkum ka Paragraph 4(2) jong ka Tenth Schedule.
Kane ka sienjam ka la pynkiew ïa ka jingkhlain jong ka NPF ha ka ïingdorbar kaba don 60 ngut sha ka 39 ngut, katba ka NPP ka la sah khlem nongthaw aiñ ha ka ïing dorbar.
