Shillong, Risaw 05 : U Myntri ka Koit ka Khiah Bah Wailadmiki Shylla ha ka sngi Nyngkong ula ong ba ia ki bhah pule MBBS la sam pyrkhing mynta kat kum ka SOP ba thymmai, ka ban pynduh ia ki jingkynnoh leh bym hok.
U Bah Wailad ula ong ba ia kane ka SOP la wanrah hadien ki jingujor ha ki por bala leit ba ki samla pule ba ioh duna mark kila ioh leit pule ha ki college ba kham bha katba kiba ioh heh mark kila shah ieh shadien.
“Hashuwa, kam shym don satia kano kano ka SOP. Ki samla pule kiba ioh duna marks ki ioh leit pule ha ki college ba bha katba kito kiba ioh heh mark kim ioh ha ki college ba bha. Ta ka daw ngi la wanrah ia kane ka SOP, ha kaba ia ka jingsam bhah la leh kat kum ka jingioh marks jong ki” ula ong.
Halor ka kynrum kynram ba mynta u snem, u Myntri ula ong ba ia ka jingsngewkhia la pynsngew ha ka jingialang syllok ba nyngkong, kaba pynbor ia ka Tnad ban pynlong ia ka kylla kaba ar.
“Ki don katto katne ki jingsngewkhia na ki samla pule bad ki kmie kpa ha ka khep ba nyngkong. Kumta, ngi la khot ia ka jingialang iasyllok kaba ap bad la pynbud da ka SOP kaba thikna” ula ong.
Hapoh ka SOP, ula ong, ki samla pule ki ioh ia ka lad ban jied ia ki college kat kum ka jingioh marks jong ki.
