Shillong Risaw 03: Ki samla kiba la iakhun ia ka jingpynrungkam Staff Nurse ha MCH Hospital, Nongstoin, kila shah iawer ban aiti ia kino kino ki jingpyntip ha kaba iadei bad kino kino ki jingleh ki bym dei, kynthup ia ka jingkam jong ka jingpynbam pisa, ka jingpdiang ia kano kano ka pisa be-aiñ, ka jingshah dawa pisa sha ka Inquiry Committee kaba kynthup ia 2 ngut ki dkhot.
Ka committee kaba kynthup ia u Executive Magistrate bad u Superintendent of Police ka West Khasi Hills, la thaw ban khmih bniah ia ki jingkynnoh halor ka jinglong jingman kiba iadei bad ka jingthungkam thungjam.
Ki samla kiba la shah jied ia ka Interview bad kino kino kiba mad ia ka jingshah kynnoh ba kila leh bym hok, hashwa ne hadien jong ka Interview, la bthah ban rekod ia ka jingkren bad jingpynpaw ka jongki ne ban aiti ia ka jingujor da ka jingthoh bad ki jingkyrshan da ki sabut.
Ka committee kan pdiang ia ki sabut kiba kynthup ia ki recording jong ka sur bad ka video, ki message bad ki jingtip kiba bniah kiba iadei bad ka jingphah pisa, ne ia kaei kaei kaba ki don.
Ia ki jingpynpaw bad ia ki jingujor, yn rekod naduh ka 5 haduh ka 9 tarik, naduh ka por 10 baje mynstep haduh 4 janmiet ha ka Kamra ne Room No. 108, jong ka ophis treikam u Deputy Commissioner, West Khasi Hills District, Nongstoin.
Ka Inquiry Committee kala ong, ba kan buhrieh bad kan ym pynpaw pyrthei ia ka jingphla jong ki samla kiba mih shakhmat ban iada ia ki na kano kano ka jingshah pyndik ne jingshah ban beiñ.
Ka committee kala kyntu ia ki samla ba kin mih shakhmat bad ban ai jingtip, khnang ba kan lah ban ai jingiarap ia kane ka jingtohkit bad ruh ban iarap ha kaban lap la ia katei ka rukom thungkam kadei kaba la leh ne em ha ka lynti kaba khuid bad ka bym shah liang bad katkum ka jingwan shakhmat jong ki samla.
