Shillong Risaw 03: Ka jingap khmih lynti ban pynlong ia ka President’s Colour Presentation Ceremony na ka bynta ka Meghalaya Police, la hap ban pynsangeh noh shwa, hadien ba u Myntri Kam Pohiing ka ri u Amit Shah ula pynsangeh noh ia ka jingthmu ban wan sha ka jylla Meghalaya.
Ia kane ka jingialang la buh tarik ban pynlong ha ka 5 tarik u Risaw ha JN Stadium, Shillong, ha kaba u Shah u dei ban long u Kongsan bad ban aiti ia ka President’s Colour sha ki pulit ka jylla.
Ki tyllong khubor kila ong, ba katei ka jingpynsangeh u Shah ban wan sha ka jylla kala pynlong ban hap pynkynriah noh ia katei ka prokram.
Haba pynthikna ia katei, ka Meghalaya Police ha ka kyrwoh khubor ha ka sngi Saitjain, kala ong, “La pyntip ba ia ka President’s Colour Presentation Ceremony ia ki Meghalaya Police kaba dei ban long ha ka Sngi Nyngkong, ha ka 5 tarik u Risaw ha J.N. Stadium, Shillong la pynsangeh noh namar ki daw ki bym lah kiar”.
Ka Tnad ka kyntu ia baroh ki heh sorkar, ki ophisar bad ia ki dkhot jong ki lad pathai khubor bad ia ki paitbah ban kynmaw ia kane ka jingpynsangeh noh bad ka bynrap ba yn sa pynbna kham hadien ia ka Tarik ban pynlong ia katei ka prokram.
