Nongstoin, Risaw 01 : U MLA ka NPP ka Nongstoin Constituency Bah Gabriel Wahlang ha ka sngi Palei, ula ujor da ka ejahar ha Nongstoin Police Station pyrshah ia u samla uba pharep bam pisa halor ka jingthungkam nurse ha MCH Hospital, kaba la saphriang ha ki rynsan social media bad ki lad pathai khubor.
Haba kren sha ki lad pathai khubor hadien ba mih na Thanad, u Bah Gabriel ula ong “Nga la ujor ia ka ejahar ban mih ka jingshisha halor ka jingshah pharep jong nga bad ki arngut ki nongialam jong nga ba ki iabam pisa ha ka thungkam Nurse ha MCH Hospital”.
“Nga kwah ban tip ia ka jingshisha. Haba nyngkong nga mut ban shu sngap namar ba ka dei tang ka jingpharep, hynrei hadien pat nga la iohi ba kala kylla politics noh. Kumta ka dei ka kamram ong nga ba kane ka kam ka dei ban shai kdar bad ba uta u briew uba ngam tip u dei u ei ruh, un mih shakhmat ban iathuh ia ka jingshisha”.
U Bah Gabriel ula ong “Ka eksam thungkam ka long kaba beit bad kaba khuid bad nga ïaroh ïa ki bor ba dei peit kiba la trei shitom bad kam don bynta ei ei ha kita ki jingpharep. Hap ban kylli ruh ïa kita ki staff nurse baroh ki ban sa ïoh kam, ba lada don tang iwei ruh kiba ong ba la siew pisa”.
“Kiei kiei kiba la jia bad kiba la mih ha kine ki sngi, ki dei tang ki jingleh politic jong ka seng VPP. Kum u nong ïalam, nga sngew ba ka jingleit pynwit ha ka por ba dang long interview, ka dei kaei kaei kaba sniew ym ka ba bha namar ba ka pynklumar ïa ka jingmut jingpyrkhat jong ki khynnah ba aplai ïa ka kam”, u la ong.
