Shillong, Risaw 01: Ka Langsning FC kala mad ia ka jingeh kaba khraw ban lah pynneh halade ia ka nam kum ka lahduh jong ka Shillong Premier League hadien ka jingshah rem da 2-0 kol ha ka Shillong Lajong FC ha madan SSA, Polo hynne ka janmiet.
Ka jingiakhun hapdeng kine ki ar kynhun ka la khring bha ia u paid ba ieit putbol, namar ka dei kawei na ki jingiakhun kaba da ia biang bor bad kaba lam iakhaid bha hapdeng kine ki ar kynhun.
Ia kine ki artylli ki kol ka Shillong Lajong FC la thep ha ki ar kylla jong kane ka jingiakhun da u Iohborlang L Lyngkhoi (45’) bad u Freddy Jyrwa (80’), bad lyngba kane ka jingjop, ka Lajong kala kiew biang halor duh jong ka miej iakhein point, hadien ba ka la ioh ba kan khur 17 point na ki 8 sien ialehkai,
Lyngba kane ka resol, kaban ka Mawlai SC, kan dei kaba kmen bha namar kala buh ialade ha ka thong ban iaknieh rah ia ka nam kum ka lahduh.
Katba na ka liang ka Langsning FC ka sah satang kawei ka jingiakhun bad katta kan long pyrshah ia ka Nongkseh SSCC.
Haba phai sha ka jingiakhun kam shim la shu kut tang ha ka jingiakhun ia ka bol, hynrei la don ki khep ba sangah para met kaba jur bha hapdeng ki para player, kaba nang pynkhuit shuh shuh ia kane ka jingiakhun.
Hynrei ka rukom ialehkai hapdeng kine ki ar kynhun hi ka long ba ka Lajong, ki la kham ialehkai sted bad tynruh beit ngak ngak ban khlem ailad ia ka Langsning FC ban lah ban tehlakam ia kane ka jingiakhun, hynrei na ka por sha ka por, ki ialeh katba lah ban nion ia ka kut ialehkai jong ka Langsning, namar ka defend line ka long ka ha kane ka kynti iakhun, ka la shah pyndik bha ha ki player ba ialehkai shakhmat ka Lajong.
Ha kum kane ka rukom ialehkai, ba mih paw pat ki kabu ksiar na bynta ki arliang ban jan lah ban ioh ban ia pynkhih lem ia ka jar, kaba na ka liang la Lajong ki rang ialehkai ki jong ba kiba la jan ioh ban pynkhih jar ki long u Wilbert Marbaniang, Riborlang L Lyngkhoi, ia kaba ym slem hadien kane u Iohborlang u la shut ia ka freekick kaba ka bol ka la dung beit ngak na kyndong ka kol bad u Rajat Paul rang ap kol ka Langsning, um shim la lah ban ioh kner shuh da la ki jong ki kti kum shi bynta ban khanglad ia ka ban nym rung shapoh ka kol.
Haba wan ban bteng ia ka kylla miet, ka Langsning ka la ioh ia ka kabu ksiar ba paka lyngba u Kyrmenskhem Mukhim uba la khyrwit ia ka bol bad la lah ban kyrda ia ka da u Lakpa Lama rang ap kol ka Lajong, hadien kane ki rang ialehkai kum ki jong u Samuel Phawa, Mebanshngain Kurkalang bad Syed Ahmed, ki la ioh ia ki kabu ksiar hynrei kim shim la lah ban pynurlong ia ki sha ki kol.
Namar ka jingshah pynher sted palat ka rukom ialehkai, ka Langsning ka la shah thep biang ka kol kaba ar, ha kaba u Freddy u la ioh ia ka bol ba la pynbuh sha u, bad ha ka khyllipmat ba biang bha, ban khyrwit ia ka kaba kampher wat lada u Rajat Paul u la ialeh ban khang lad ia ka, hynrei ka bol kaba la lam kham jam ba kan lap ba tyllun sha lyndet jong ka kol, kaba hangne hi marsien iohi ba la shah pynkhih ka jar, kam lah ban khlem da pynjem hi toin ia ki khnap ka kynhun ialehkai ka Langsning FC.
Hadien ba la shah thep ka kol kaba ar, ka Langsning ka la pyrshang kat lah kat iai ba kan pyniakhaid, kaba hangne mih paw biang ki kabu ksiar lyngba u Donlad Diengdoh, u Samuel bad na u Richie Kharbani, hynrei ki jingpyrshang baroh ki long lehnohei namar ba kim shim la lah ban pynkhih ia ka jar.
Lashai ka sngi, ka Mawlai SC kan mih madan ban iakhun pyrshah ia ka Sawmer SC kaban long ha ka por 3 baje nohphai sngi.
