Shillong, Nailur 30: Haka jingkhynra haka por mynmiet ha khappud Meghalaya-Assam, ka Khasi Students’ Union (KSU) ka la pynphai noh ia ki 42 ngut ki briew kiba wan daka bos na Assam hadien ba la kynnoh ba kim shym la lah ban pyni ia ki kot ki sla kiba biang.
Ia katei ka bos kaba don ia u number AS 15 AC 1929 la pynsangeh da ki dkhot ka KSU Umsning Circle bad Nongpoh Circle ha ka shnong Umsamlem kaba don ha surok NH-6 hajan Umsning ha ka por kumba 12.30 baje shiteng synia hadien ba ka seng ka la ioh ia ka jingpyntip halor ka jingwan ki briew kiba nabar ki bym don kot don sla.
“Hadien ba ngi la ioh ia ka jingtip kaba thikna ba kawei ka bos kaba kit ia ki briew kiba nabar na Assam ka la wan rung sha Meghalaya, ngi la bat iaki ha Umsamlem kaba don ha National Highway-6 ha ka por 12:30 shiteng synia” la ong ka KSU.
Iaki 42 ngut ba wan daka bos la kylli bniah bad hadien kata la pynphia biang ia ki sha ka jaka ba ki wan namar ba kim don ia ki kot ki sla kiba biang.
Ka KSU ka la kynnoh ba katei ka kynhun kam shym la leit hi dalade bad la pynsuk ia ka da u local handler uba ju iarap ia kum kine ki kynhun ban rung shapoh ka jylla Meghalaya.
“Haba kylli, ki la kam ba don uwei u briew uba la ialam bad synran ia ki ban rung suk sha ka jylla jong ngi,” la ong ka Synjuk da kaba pynpaw ba ka la ithuh ia u nongpyniaid bad kan wad ia u na ka bynta ban leh ia kaba donkam.
Ka KSU ka la ong ba ka long kaba sngew lyngngoh ba kum kane ka jingïaid laitluid ka jia watla ka Meghalaya Identification, Registration (Safety & Security) jong ki Migrant Workers Act, 2020 kala treikam.
Ka kynnoh ba kine ki briew kim dei ba ki wan hi sha kane ka Jylla bad kala kynnoh ba don ki trai Jylla kiba iarap iaki ban wanrung sha Meghalaya.
Ka KSU ka la pyniadei ia kane bad ka jinglah ban ioh kam ha East Jaintia Hills, da kaba kynnoh ba ki karkhana dewbilat ki ai kam iaki bar Jylla nabar ha ka bainong kaba kham duna.
Kala ong ba kane pynshisha ba ka ain MIRSS ka treikam tang haki kot sada ym kumba kam ka sorkar ba ka treikam pura.
“Ka ain ka dei ban trei bha haduh ki jaka bylla, ki karkhana, ym tang ha ki kot khubor,” la ong ka KSU da kaba maham ba kan pynjur ia ka jingkhynra ha ki sngi ban wan ban pynshisha la ki nongbylla ki wan rung lyngba ki lynti kiba biang ne ki wan rung tuh.
Ïa kane ka jingkhynra la ïalam da u president ka Umsning Circle u Lester Nongbet ha ryngkat u president ka Nongpoh Circle u John Lyngdoh bad kiwei kiwei ki dkhot ka KSU.
