Shillong, Nailur 29: Lah jan 10 snem ba kawei ka khynnah kynthei kaba don jingduna ha ka bor pyrkhat, kala shah leh be-ijot, ka Iingkashari Special Judge (POCSO) kala rai pynrem ia u nongleh bymman da kaba hukum set 10 snem ha phatok.
Ka iingbishar jong ka Kong R Rymbai, Spl. Judge (POCSO), East Khasi Hills, ha ka 25 tarik u Nailur kala shem ba u Bah Batskhembor Diengdoh ula leh ia ka kam bakla ha Spl (POCSO) Case No. 55 jongu 2017 kaba la ujor ha Rynjah PS Case No. 28(10)2016.
Ha ka kyrwoh hynne ka sngi baar, u SP ka East Khasi Hills Bah Vivek Syiem ula ong, ba ia katei ka jingjia la rejistar case ha ka 17 tarik u Risaw 2016, hadien ba la ioh pdiang ia ka ejahar ba u Bah Diengdoh ula leh be-ijot ia ka khun kynthei jong u nongujor kaba dei kaba don jingduna ha ka bor pyrkhat.
Ki pulit kila kem bad hadien kila aiti ia ka charge sheet CS No. 31/2017 jongka 31.05.2017 hapoh ka Section 5(k)(j)/6 jongka POCSO Act.
Haba rai pynrem ia une u nongleh kam sniew, ka iingbishar kala hukum ban set 10 snem ha phatok bad ban daiñ kuna T.30,000 hapoh ka Section 6 jongka POCSO Act bad ban set sa 3 bnai kum ka jingpynsajia lada um siew ia katei ka jingshah daiñ kuna.
Une u nongleh kam sinew ula shah set lypa 3 bnai bad 2 sngi ha phatok katba ka jingtian bishar ka dang iaid shakhmat bad yn iai bteng ban shong ha phatok haduh ban da pyndep ia katei ka jingshah pynsajia.
Ia kane ka jingtohkit la ialam da ka WP/Insp Kong BM Kharakor bad mynta ka don ha CID Organisation, Meghalaya, Shillong.
