Shillong Nailur 29 : Ka Iingkashari Meghalaya High Court ha ka sngi Nyngkong kala pynwai noh ia ka PIL ba kyrpad ban pynlong kloi noh ia ka elekshon Garo Hills Autonomous District Council (GHADC), haba pynpaw ba ka Sorkar kala dep pynjlan ia ka samoi treikam jong ka Council bad thung ia ka Delimitation Committee.
Ka Division Bench ka Chief Justice Revati Mohite Dere bad Justice W Diengdoh kala pynmih ia kane ka hukum haba shong bishar ia ka PIL bala mudui da u Nilberth Ch Marak ba kyntu ban bthah pynlong noh ia ka elekshon GHADC lane pynjari da ka Administrative Rule.
Haba shong bishar, u Advocate General ND Chullai ula aiti ia ka affidavit jong u Joint Secretary, District Council Affairs, Rapborlang Kharbihkhiew ba 2 tarik Nailar 2026.
Ka affidavit ka pynpaw ba namar ka jingsniew ka shongsuk shongsain, ka Sorkar ha ka 11 tarik Lber 2026, kala pynjlan ia ka elekshon GHADC tad haduh da pynmih da kawei pat ka hukum.
Kala pynpaw ruh ba ha ka 18 tarik Lber 2026, u Lat ka Jylla, haba sngewhun ia ki jinglong jingman, ula pynjlan ia ka samoi treikam jong ka Council bad ki dkhot sa hynriew bnai naduh ka 19 tarik Iaiong 2026 haduh ka 18 tarik Risaw, 2026, hapoh ka proviso to sub-paragraph (6A) jong ka paragraph 2 ka Sixth Schedule pule lang bad ka Rule 7 jong ka Assam and Meghalaya Autonomous Districts (Constitution of District Councils) Rules, 1951.
Ka affidavit kala pynpa wruh ba ha ka 6 tarik Iaiong 2026, ka GHADC kala thung ia ka GHADC Committee ban bishar ia ka jingdon paid ki jaidbynriew ha kathain bad ban pynbeit mar katjuh ia ki constituency ka GHADC kaba pynshong nongrim kat kum ki khana samari bad ka jingdon paid.
Kat kum ki kyndon bala buh, ka Committee kan hap bishar ia u pud u sam kaba pynshong nongrim halor ka jingdon ki briew bad ka jinglong ki jaka, pynkhreh ia ka draft delimitation, pynlong ia ka jing iasyllok paidbah bad ki hearing, bad rai ia ki jingai jingmut ia kiba thymmai halor u pud u sam ki constituency lane kiba la pynbeit da kumwei.
Ka Committee kan hap ban aiti ia ki jingai jingmut ha u Secretary ka Executive Committee ka GHADC hapoh ka hynriew bnai naduh ka sngi ba pynmih ia ka jingpynbna, ryngkat ka kyndon ban pynjlan ia ka samoi treikam ka Executive Committee.
“Haba pyrkhat ia kine kiei kiei, ia mynta, ngim shym sngew iahap ban mynjur ia ka jingkyrpad jong u nongmudui” ong ka Iingkashari.
Ka Iingkashari kala kren shai ba ka long laitluid ia u nongmudui ban file ia ka mudui biang lada ia ka elekshon ym shym la lah ban pynlong hapoh ka por kaba dei.
