Shillong, Nailur 28: Ka Nongkseh ka la pynliem ia ka Sawmer da 3-0 kol ha ka jingialehkai jong ka Shillong Premier League 2026 ha SSA Stadium mynta ka sngi.
Ki nongthep kol na ka bynta ka Nongkseh ki long u Kitboklang Pale (30’), u Mebankhraw Wahlang (37’) bad u Hardy Cliff Nongbri (88’), kaba la iarap iaka Nongkseh ban kiew sha ka kyrdan kaba lai hadien baka la ioh khur iaka jingjop kaba lai sien lynter.
Ka Nongkseh mynta ka la ioh khur 13 poiñ na ki hynniew sien ki jingialehkai bad ka la kiew halor ka Mawlai (12 poiñ na ki hynriew sien ki jingialehkai). Katba ka Sawmer pat ka dang neh ha ka kyrdan kaba hynriew da kaba kamai 9 point.
Ka Sawmer ka la ialehkai bha haka kyllastep hynrei kam lah ban khanglad ïa u Kitboklang, uba la ïoh iaka bol bad daka pynliem ïa u Khrawkupar Tamu ban ioh pynkhih jar nyngkong eh.
Hadien katto katne minit ka Nongkseh ka la ioh ban thep biang lyngba ka Corner bala shut da u Hardy bad thep pat da u Mebankhraw da ka khlieh.
U Pyrshangbanbha Dkhar ka Sawmer u la leh bakla ha ki katto katne ki khep ba ap gol hynrei mynta ka sngi ula lah ban iada arsien naka jingshah thep.
Hadien ba la kyllastep, u Chesterpaul Lyngdoh bad u Shano Tariang ki la pyrshang ban thep hynrei baroh arngut kila sniewbok.
Hynrei u Hardy u la lah ban ioh thep gol hadien ba u Kitboklang u la mareh ryngkat bad ka bol bad ula ioh ban pass sha u kapten uba la ioh thep suk.
Kaba kaba bha tam iaka Sawmer kadei haka 70 minit lyngba ka free kick jong u Wanshanlang Dkhar ha kaba ka ball kala dei ia u goal post.
Lashai ka sngi ka Mawlai kaba don ha ka kyrdan kaba saw kan ïakhun pyrshah ïa ka Meghalaya Police kaba don ha ka kyrdan kaba san ha ka por 3 baje janmiet.
