Shillong, Nailur 26: U Myntri Rangbah ka Jylla u Conrad K. Sangma ula pynthikna ia ki nongrep ban ai ka jingkyrshan ha ka kam ri sniang bad ha ka kam rep syntiew bad ka banjur ba ki prokram jong ka sorkar kidei ban jam shaphrang ryngkat bad ka jingioh ia ki jingpynsngew ia kaei kaba jia ha madan.
Ha ka ‘Live with Conrad’, u Myntri Rangbah ula kren beit beit ia ki jingeh kiba la pynpaw da ki nongrep kiba dei ki longkmie bad ki nongioh jingmyntoi lyngba ka CM Elevate ha kaba iadei bad ka kam ri jingri, ki lad kiba iadei bad ki iew ki hat bad ka jingpyntreikam ia ki skhim haka rep ka riang.
Ki nongrep kila ong, ba ki nongpynmih ki ju mad ia ka jingeh ha kaban pynmih bun ia ki jingthung bad ia ka jingbha ka jong ki.
Kala kdew ia ki jingeh hapoh jong ka CM Elevate Piggery Scheme, da kaba ong, watla ki nongioh jingmyntoi kila ioh ia ka jingkyrshan ban ri sniang, hynrei ban ioh pat ia ki nongthied ia ki sniang ynda kila heh la san, ka long kaba jynjar bha.
Halor ka jingseisoh jongka kam rep syntiew, kala kylli ia ka sorkar, la ka lah ban pynbiang ia ki jingkyrshan ha kaban pyniaid iew, kaba kynthup ia ka jingiarap beit beit ban pyndie ia kine ki jingpynmih.
Haba pynpaw halor kitei ki jingsngewkhia, u Sangma ula ong, ba ka sorkar kala iaid da ka jingbteng ban khmih na ki jinghikai na ki nongrep bad ban pynbha ia ki skhim katkum ka jingshemphang.
“Haba ngi lah sdang treikam da ka jingthmu ban iarap ia ki nongrep, ngim shim la don lypa ia ka lad ban pynbeit ia ki jingeh na ka bynta kiei kiei baroh ne ban ioh lut ia kiei kiei kiba dei lut naduh kaba sdang” ula ong.
Ula ong, ba ka jingai jingkyrshan ha ka kam rep kadei ban iaid ha baroh ki liang, naduh ki tynrai, jingkyrshan da ka song tyngka, jingpyniasoh bad ki iew bad ka bynrap ba ka jingpynsngew na ki nongrep ka long kaba kordor bha ia u bad ia ka sorkar.
Halor ka kam ri sniang, u Sangma ula batai ba ki prokram kiba mynshwa kila mad ia ki jingeh namar ba ki sniang kiba la wanrah nabar ka jylla kim lah ban im bha hapoh Meghalaya na ka jinglong jingman jong ka suinbneng bad kala lam sha ka jingiap jong kine ki jingri.
Ka sorkar mynta kala jam shakhmat ban sam ia bunjait ki khun sniang kiba la pynmih hi ha ka jylla bad kala wanrah ruh ia ka rukom ai jinghikai kaba kongsan hapoh jong ka CM Elevate Piggery Scheme ban kyntiew ia ka jinglah bha ba kin im bad ruh ban pynmih bun.
Halor ki jingsngewkhia kiba iadei bad ki iew ki hat kiba la pynpaw da ki nongrep, u Sangma ula pynpaw ba kala don ka jingiatreilang hapdeng ka sorkar bad ki kynhun shimet ha ka kam rep ia ki syntiew ki skud.
Hapoh jong katei ka Model, ki kynhun shimet ki iatreilang bad ka sorkar bad ki nongrep ban pynbiang ia ki tynrai, ka jingai jinghikai bad ka jingthied kylla. Ka jingthmu ka long ban pynbiang ia ki nongthung bad ka jingpynthikna ia ka iew bad pynduna ia ka jinglut bad ia ka jingma ha ki iew ki hat kiba iadei bad jingdie ia ki jingpynmih ki jongki.
U Myntri Rangbah ula ong, ba kum kitei ki jingtuklar kidei da ka jingthmu ban pynlong ia ki skhim sorkar kiba iadei bha bad kiba pynleit jingmut bad ki nongrep da kaba shimkhia ia ki jingeh ha ki bynta baroh kiba iadei bad ka jingpynmih bad ka jingiaid ha ki iew ki hat.
Kane ka jingiakren ka pyni ruh ia ka jingpyrshang ka sorkar ban shim beit beit ia ki jingpynsngew na ki nongrep ban pynbha shuh shuh ia ki prokram bad ban pynkhlain ia ki lad kamai ha ka jylla Meghalaya khamtam ia ka ioh ka kot ha ki thain nongkyndong.
