Shillong, Nailur 26 : U National Vice President ka NPP bad Symbud Myntri Rangbah Bah Sniawbhalang Dhar ha ka sngi Thohdieng ula kyntait ia ki jingkynnoh ba u don jingthmu ban leit iasoh sha ka BJP, haba pynpaw ba u dei jong ka NPP bad ban iai neh beit bad ka NPP.
Haba kylli halor ki khubor hamsaia ba un kynthih sha ka BJP hadien ba leit iasoh ki 8 ngut ki MLA ka UDP, u Bah Sniawbha ula ong “Em, phi iohi, katto katne kila khot ia nga shimet bad khroh ia nga shimet bad kam don ka jingleh bakla lada ki khot ia nga, ki kwah ban pynshisha na ngi hi, hynrei nga kwah ban pynthikna sha phi ba ngan iai neh beit bad ka NPP jong nga”.
U Bah Sniawbha ula ong ba um lah ban shet kylla ia ka rai bala ai ha u da ki paidbah ka Nartiang bad ka Jylla Meghalaya.
“Nga hap ban burom ia ki briew jong nga khamtam na ka constituency jong nga, kila jied ia nga na ka NPP bad lada kren hok, Nga dei jong ka NPP bad ngan iai neh bad ka NPP. Ka jingkylli ban kyntiap sha kiwei pat ki party kam mih satia. Ngam lah ban shet kylla ia ki paidbah ka Nartiang bad ka Jylla” ula ong.
“Lada nga iakhun ia ka elekshon na kane ka party, nga hap ban iai neh bad kane ka party. Kane ka dei ka nongrim jong ga” bynrap u Bah Sniawbha.
