Shillong, Nailur 25 : Ki 8 ngut ki MLA ka United Democratic Party (UDP) ba iasoh sha ka Bharatiya Janata Party (BJP) kila aiti ia ki kot ki sla ban pynskhem ia ka jingiasoh sha ka Meghalaya Legislative Assembly bad mynta kane ka kam kala don ha ka jingbishar jong u Lamphang.
U nongaibuit ka Meghalaya Legislative Assembly Bah Andrew Simon ha ka sngi Thohdieng ula pynthikna ba kine ki MLA kila aiti lut ia baroh ki kot ki sla kiba donkam.
“Baroh (8 ngut ki MLA ka UDP ba iasoh BJP) kila aiti ia ki kot ki sla jong ki. U President ka BJP bad Bah Sanbor Shyllai kum u Nongialam ka Legislative Party, kila phah ia ka shithi sha u Lamphang ba pyni ia kane ka jingwan iasoh sha ka BJP” ong u bah Simon.
Haba pynshai ia ka rukom long kane ka jingkylla ha ka sain pyrthei, ula ong “Hooid, kane ka dei ka jingiasoh. Ngi la thikna ba ka dei ka jingiasoh bad ka BJP. Kila aiti ia baroh ki kot ki sla bad yn sa pyniaid ia ki. Yn sa shong bishar da u Lamkhang bad un sa pynmih ia ka hukum”.
Halor u MLA ka Nongpoh Bah Mayralborn Syiem ba um shym la iadonlang ha ka jingaiti ia ki kot ki sla, u Bah Simon ula iathuh ba ia ki kot ki sla jong u ruh lah dep ban aiti.
“Ki kot ki sla jong u ruh ki don lang. La pyntip sha nga ba u don kiwei pat ki kam hynrei ula aiti ia baroh ki kot ki sla hynne” ula ong.
U Bah Simon u iathuh ba u Lamphang un sa shim ia ka rai hadien ba u shong bishar lut ia baroh ki mat bala kdew ha ka shithi.
