Shillong, Nailur 25: U Chief Secretary ka Jylla Dr Shakil P Ahammed ula ban jur ia ka jingdonkam ban don ka jingiatreilang jong baroh ki tnad sorkar bad ka UIDAI ban pynbeit ia ki jingduna ha ka jingpynrung kyrteng Aadhaar bad ban pynurlong ia ka thong ha ka por kaba la buh.
“Ka long kaba donkam ban don ka jingiatreilang da baroh ki tnad bad ka UIDAI Regional Office, Guwahati, ban shimkhia, ithuh ia ki jingduna bad ban pynurlong ia ka jingthmu ha ka por kaba la buh” ong u Dr Ahammed.
Ula lum ia ka jingialang jong ka State-Level Unique Identification Implementation Committee (UIDIC) na ka bynta u snem 2026, kaba la long ha Shillong ha ka sngi Balang ban khmih bniah ia ka jingiaid shakhmat jong ka jingpynrung kyrteng Aadhaar, jingpynthymmai bad jingpynshisha.
Ha kane ka jingialang la wan ban iashimbynta da u Ngachan Zimik u Deputy Director General ka UIDAI, u Lt Col Swapan Kumar Saxena u Director ka UIDAI bad ki heh ophisar kiba kynthup ia u Pravin Bakshi u Commissioner & Secretary, IT, FCS & SWD bad u Swapnil Tembe u Secretary ka GAD (B).
U Ngachan Zimik ula ai ka jingbatai kaba bniah halor ka jingpynrung kyrteng Aadhaar bad ka jingpyndonkam ha Meghalaya bad pynpaw ba kala don ka jingkiew ha ka jingpynrung kyrteng, ka jingpynthymmai, ka jingpynshisha bad ula kdew ruh ia ki bynta kiba donkam ban khmih bniah bha.
Kawei na ki mat kaba kongsan kadei ban pynsted ban pynrung kyrteng Aadhaar ia ki khynnah kiba ha ka rta kaba 0-5 snem lyngba ka Birth Registration Based Aadhaar Enrolment (BRBAE) ha ki district hospital bad ki jaka ai jingsumar da kaba pyndonkam ia ka Birth Registration Number (BRN).
Ka jingialang kala banjur ruh ban pynbha iaka rukom pynrung kyrteng ha ki district kiba dang duna ia ka jingpynrung kyrteng bad ban pynkhlain ia ka Mandatory Biometric Update (MBU) na ka bynta ki khynnah.
“La pynshlur ia ka School Education Department ban pynlong ia ka MBU ha ki skul ban plie lad ban pyndep ha ka por kaba biang ia ka Biometric Updates” la ong ki ophisar bad ka ai jingmut ban pyniasoh lang ia ka jinglong jingman ka MBU bad ka UDISE+ Portal ban iarap ia ki skul ban ithuh ia ki khynnah kiba donkam ban pynthymmai ia ki jingtip.
Haba pynpaw ia ka jingkongsan ban pynthymmai ia ki jingtip, u Zimik ula ong, “Ka jingpynthymmai ha ka por kaba biang ia Biometric kan iarap ia ki khynnah pule ban mad ia ki jingeh ha kaba iadei bad ki jingtip, ban ioh pdiang ia ki skhim sorkar bad Scholarship bad ban ialeh ia ki Competitive Examination kum ka NEET, JEE bad CUET”.
Ka jingialang kala iakren shuh shuh leh digital noh ia ki kot ki sla jong ka sorkar bad ban pynrung lang noh ia ki QR Code ban pynskhem ia ki jingpynshisha bad ban pyniar ia ka jingpynshisha u Aadhaar na ka bynta ka jingai jingshakri kaba khuid ba suba.
La pynshai ruh ba ha ka Aadhaar App ba thymmai kan kynthup ia ka Offline bad ka jingpynshisha da ka QR code, Biometric lock/unlock bad ka Offline Verification Seeking Entities (OVSEs) ki ban pyndonkam haba leit sah ha ki hotel, hospital bad pynthikna ia ka rta.
