Shillong, Nailur 24: Ka Shillong Lajong FC ka la kiew sha ka kyrdan ba nyngkong ha ka miej iakhein point ka Shillong Premier League 2026 hadien ka jingjop da 3-0 ia ka Laitkor SC, ha ka jingiakhun hynne ka nohphai sngi ha SSA Stadium, Polo.
Kine ki lai tylli ki kol ka Shillong Lajong FC la thep da u Freddy Jyrwa (27’), Rimankhraw Kharumnuid (63’) bad sa shi kol kaba wan ha ka dur ka penalty la thep ia ka da u Iohborlang L Lyngkhoi (77’).
Da kane ka jingjop, ka Shillong Lajong FC kala ioh khur 14 point na ki 7 sien ialehkai, katba ka kynhun ba don ha ka kyrdan kaba ar- ka Langsning FC kaba la khur 13 point, hynrei ka kabu ia kane ka kynhun pat ka long ba ka don tam ia ka jingiakhun, katba ka kyrdan kaba lai la bat ia ka mynta da ka kynhun ialehkai ka Mawlai SC.
Haba phai sha ka kynhun ialehkai ka Laitkor, kane kan dei ka sien kaba lai ba kan mad ia ka nam rem hakhmat ka Shillong Lajong ha ki jingiakhun ba ki la ia kynduh ha madan ha ki snem ba la dep, bad ia ka jingiakhun kaba mynta ka sngi pat ka dei ba la bynrap da ka jinglah ban shan skhem bha triang da ki rang ba ialehkai dien ka Shillong Lajong.
Naka bynta ka Lajong naduh kaba sdang, ki khynnah ialehkai ki jong ka, ki la kut jingmut triang ban nym khein sting, ban nym shah jem ne ailad ia ka Laitkor ba kan ialehkai da kaba suk.
Lashai pat ka sngi ka jingiakhun kan long hapdeng ka kynhun ba bat ha ka kyrdan kaba 8 ka Nangkiew Irat pyrshah ia ka Mawlai SC, kaban long ha ka por 3 baje nohphai sngi.
Ka Mawlai SC kan rung sha kane ka jingiakhun kum ka kynhun bym pat shim la shah rem ha kane ka samoi ialehkai ba mynta ka SPL bad ka jingjop beit beit kan pynpoi biang pat ia ka sha ka kyrdan ba nyngkong ka miej iakhein point, namar ka jingiapher ka jong ka bad ka Shillong Lajong ka long ha ka jingiathep kol (goal difference) kaba long da +7 la +4
