Shillong, Nailur 23: U Conrad K Sangma ula ong ba ka Shillong ka hap ban iathuh ia ka khana kaba pher halor ka teknoloji — Kawei kaba ki kompani ki shim jaka ban buh opjhis treikam hynrei shaei ka roi ka par, ka jingleh Testing bad jingwad ia ki lad ban pynbeit kila urlong ym tang hapoh Meghalaya hynrei shaduh shabar.
U Myntri Rangbah ula kren ia katei ha ka jingplie ia ka Shillong Tech Park-II ha New Shillong Township ha ka sngi Balang, ula ong ba ki jingdon jingem ym dei ban shu shim ba kadei tang ka IT Park hynrei kum ka Tech bad Innovation Park.
Ka jingiohi jngai ka jongu ia ka Shillong ban kylla long kum ka Centre of Excellence ka thain shatei lammihngi, BIMSTEC bad Southeast Asia, da kaba wanrah ia ki briew ym tang ban shu trei ha kaba iadei bad ki Technology hynrei ban pynmih ia ki lad ban pynbeit kaba kiwei pat kin hap ban pyrthuh bud lem.
“Mynta, ka sorkar kadei kawei na kiba heh tam ha kaban pyndonkam ia ki kor Technology” ong u Sangma bad ka ai jingmut ba ki jingpynbeit kiba la pynmih ha Meghalaya lah ban pynbud da kiwei pat ki jylla.
“Jan mar shiteng na ka jingdon ki briew ha ka jylla kidei kiba don hapoh ka 20 snem bad tang 5 ne 6 lak ngut ki briew kidei kiba la don palat ia ka 45 snem ka rta,” ula ong. “Kumta ngi don bun ki samla, kiba la sdang ban leh lut ia kiei kiei katkum ka jingiaid ka juk bad kidei kiba don jingtip bha ia ki kor teknoloji”.
Ka Sorkar ka kyrmen skhem ban tei halor katei lyngba ka Meghalaya State Skill Development Society bad ka Meghalaya Skills programme, ka Government Engineering College kaba nyngkong ha ka jylla bad ka Skill University kaban sa don marjan bad Tech Park.
Hynrei u Sangma ula ong, ba ka sorkar kam dei pat ban pyrshang ban ai jinghikai ia ki samla ha man la ki sobjek. Hynrei ula iawer ban don ia ka jingiatreilang kaba khlain bad ki kompani bad ki lad jingpule ne ki Course kiba iadei bad ki jingdawa bad jingdonkam ha ki iew ki hat, kidei kiba donkam kyrpang bha ia ki jingpyntbit bad ia ka sap ka phong.
“Ki briew ki long kawei na ki jaka kiba kongsan ha kaban kyntiew ia ka IT” ula ong.
Na ka bynta u Myntri Rangbah, ka technology kadei kawei na ki atiar ha ka sawdong sawkun kaba iar jong ka ioh ka kot bad ka khaii pateng. Ula kdew ba ka Secretariat kaba thymmai bad ka Administrative City ha New Shillong, ka football stadium kaba thymmai kaba dang tei ha ka jinglut kaba T.700 Klur, ka jingpynmih ia ka bynta jong ki jaka sah bad ban pynbha ia ka leit ka wan lyngba ki surok bad kad liengsuiñ.
Ula ong ba ka Meghalaya, kala don 54 snem ka rta bad kala iohmad ia ka jingshemphang na ki 27 tylli ki sorkar, kaba katto katne kila lah ban neh ym tang hapoh jong ka shi bnai. Kane ka sorkar kaba mynta kala pyndep 8 snem ia ka jingshakri ha ka ophis, ia kaba ula ong, ba kadei ka sorkar kaba la ioh ban shakri slem tam ha ka histori jong ka jylla.
“Ka ioh ka kot jong ka Meghalaya kala kiew arshah naduh u snem 2018 bad ngi lah buh halade ia ka thong ban kyntiew arshah biang hapoh u snem 2032” ula ong.
U Sangma ula ai jingiaroh ba katto katne na ki jingai jingmut kila mih na ka jingleit sha Berkeley ha u snem 2018-19, ha kaba ula iakynduh ia ki nongialam jong ki karkhana kiba mynta kila wan ban kynshew tyngka ha Meghalaya.
Ula ong, ba u kwah ba ia ka Shillong yn tip kum ka jaka kaba ki nongialam kin sdang ia ki kam kiba thymmai bad ki jingai jingmut yn lah ban pynwandur.
Ka jingiohi jngai kan pyniar ia ki kompani IT tynrai, ula ong, ba da ka jingsengkam bad jingpynmih ia ki buit kiba thymmai kan thaw ia ka bynta ia ka sawdong sawkun kaba iar ha ki teknoloji.
Ula pynpaw ruh halor ka jingkongsan ban long kiba ryntih bad ban trei bha ia ka kam, da kaba pyndonkam ia ka prokram jong kane ka sngi kum ka bynta ban batai bha ia katei ka mat.
“Kadei ha kane ka jaka ha ka por 4.15 nohphai sngi bad nga lah sdang ban iaid ha ka por 4.29 nohphai sngi, khnang ba ngin lah ban sdang ha ka por kaba biang” ula ong.
Ha kaba iadei bad ka jingiatehkular kaba la iasoi ha Tech Park, u Sangma ula ong, ba u kwah ban don tang khyndiat eh ki jingpynbna bad ban bun da ki sienjam ha kaba iadei bad ka jingkynshew tyngka bad ka jinglait kam.
“Nga long pyrshah ia ki MoU ia kaba bunsien kidei tang ki jingkular kiba shu thok. Kane kadei kaba shisha. Ka jingiasoi ia ka jingiatehkular kadei kaba shisha. Ki kam kiba ngi lah thaw ruh kidei kiba shisha”.
“Ngi ngim kwah ban don ia ki khana kiba heh bad ki MoU kiba heh. Ngi ngin leh khyndiat hynrei ngin leh bha pat ia ki”.
Ka jingiohi jngai, kadei kaba long palat ban ia ka kyrdan jong ka Shillong kum ka nongbah bathymmai ha ki karkhana IT. Ka thong ka long ban kyntiew ia ka nongbah sha ka shlem kaba ki paitbah, ki jingpynmih ia ki buit bad ki jingsengkam ki lah ban wan lang hajuh bad ia kaba ia ki jingeh ruh yn lah ban pynbeit na ki jaka lum kan lah ban poi sha jngai bad kan iar ruh.
