Shillong, Nailur 23 : U National Spokesperson ka BJP Sambit Patra ha ka sngi Balang ula ong ba ka Sorkar Pdeng kan sa shimkhia ban khmih ia ki katto katne ki ishu ba kongsan kiba dei jong ka Meghalaya kynthup ka jingpynrung ia ka ktien Khasi bad Garo ha ka Khyrnit ba Phra ka Riti Synshar, Amendment jong ka Meghalaya Residents Safety and Security Act (MRSSA), ka kam tih dewiong bad ka jingpynkynriah ia ki Sikh na Them Iew Mawlong.
U Patra ula pynpaw ia kane haba kren ha ka jingialang ha Headquarter ka BJP ha New Delhi hadien ka jingwan iasoh ki 8 ngut ki MLA ka United Democratic Party (UDP) sha ka BJP.
Haba kdew ia ka jingkren u Myntri ka Sorkar Pdeng Kiren Rijiju ha ka jingialang, u Patra ula ong ba kine ki MLA kila wan iasoh sha ka BJP hadien ka jingsakhi ia ki kam pynroi kiba la leh da ka Sorkar NDA hapoh ka jingialam u Myntri Rangbah Duh ka Ri Narendra Modi.
U ong ba ka thain Shatei Lam Mihngi kala sakhi ia ka jingkylla kaba khraw bha naduh usnem 2014.
“Shuwa u 2014, ia ka Sorkar Congress, NE-North East- ka mut ka bym don satia. Hadien ba wan u Modi, NE ka kylla long ka engine ka jingkiew shaphrang ka India. Na ka jingbym don sha ka engine ba thymmai, kane ka dei ka jingkylla kaba khraw eh ia ka thain Shatei Lam Mihngi” ong u Patra.
U iathuh ba ka jingiakren bad ki phra ngut ki MLA kala iaid eh halor ka roi ka par bad ki saw tylli ki ishu kiba kongsan kiba ktah ia ka Meghalaya.
U Patra ula ong ba ka jingdawa ban pynrung ia ka Ktien Khasi bad Garo ha ka Khyrnit ba Phra ka dei kawei na ki mat bala mih ha ka jingiakren.
“Sabka Saath, Sabka Vishwas bad Sabka Vikas ka iohi ia kane kum ka kabu ban burom ia man ki ktien ki thylliej hapoh ka thain Shatei Lam Mihngi bad man ki jaidbynriew riewlum ha ka thain” ula ong.
U Para ula ong ruh ba ka Sorkar kala khmih ia ki ishu kiba iadei bad ka jingpynkylla ia ka MRSSA bad ka jingtih dewiong.
Halor ka kam ban pynkynriah ia ka Them Metor, u Patra ula ong ba iaka jingiakren la pynlong bad u Myntri ka kam iada ri Rajnath Singh.
Ula pynpaw ia ka jingsngewskhem ba kine ki mat jingdawa yn sa pynbeit hapoh ka jingialam u Myntri Rangbah Duh Narendra Modi bad u Myntri Rangbah ka Jylla Conrad K Sangma.
Ki 8 ngut ki MLA ka UDP kila pan ia ka jingkular na ki nongialam ka BJP halor ki ishu bapher bapher ka Jylla hashuwa ba kin shim rai ban kynthoh seng.
