Shillong, Nailur 21: Ka Jaintia National Council ha ka sngi Nyngkong kala pynsangeh ia ka jingshna ia ka Eklavya Model Residential School (EMRS)ha ka shnong Kairang hadien ka jinglap ba da ki spah ngut ki nongbylla bar jylla ba pyntrei ia kane ka skul kidei ki bym don ia ki kot ki sla kiba biang.
Ia kane ka jingkhynra la ialam da u general secretary ka JNC u Bah Wanshwa Suting.
U Bah Suting ula ong ba u kontraktor jongka Badri Rai Company, ula pyndonkam da ki nongbylla kiba nabar ka jylla Meghalaya.
“Ngi lah shem ba la wanrah da ki spah ngut ki nongbylla kiba nabar ka jylla. Ym shim la don ruh uwei uban don ia ki lisen ne ki kot ki sla kiba biang kiba donkam ban trei hangne” ula ong.
Ula ong ba kitei ki nongtrei kila pynkhein ia ka MRSSA bad ia ki kyndon ain jong ka JHADC.
“Katkum ka MRSSA 2020, man la ki briew ki bym dei ki riewlum ki hap ban don ia ka Registration Card bad ki hap ban rejistar hapoh jong ka Section 6(1) hakhmat jong u Registration Officer. Kidei ruh ban don ia ka Employee Service Licence hapoh jongka Rule 20(1) jongka JHADC Trading by Non-Tribals Rules, 2015. Kine ki nongtrei kim shim la don eiei” ong u Bah Suting.
Ula ong ba EMRS project hapoh jongka Ministry of Tribal Affairs kadei na ka bynta ban ai jingmyntoi ia ki riewlum.
“Kane ka kadei kaba ai jingmyntoi bha, kan don ia ki hostel, ki jaka ialehkai, skill development bad ki lad ban iohkam. Ka jingthmu ka long ban ai jingmyntoi ia ki riewlum ym ia ki bym dei ki riewlum. Hynrei kaba sngewsih ka long ba tang ki bym dei ki riewlum kila treikam hangne” ula ong.
Ka JNC kala shah ban treikam tang ki nongbylla na ka thain bad kila khang pyrshah ia ki bym dei riewlum katba kim pat pynbiang ia ki kot kiba donkam.
“Ngi lah pynsangeh ia ka jingtreikam jong ki nongbylla ki bym dei riewlum. Tang ia ki nongbylla kiba dei ki riewlum na ka thain ki lah ban bteng. Ngi lah dep ong, da kaba shai ia ka company ba kam dei ban wanrah da ki briew kiba nabar haba ki don ki briew kiba na ka thain kiba lah ban trei ia katei ka kam” la bynrap u Suting.
