Shillong, Nailur 20: Haduh 127 ngut ki samla ha nongbah Shillong ki la ioh ia ki shithi thungkam haka program sam shithi thungkam Rozgar Mela kaba 20 sien ha ki 45 tylli ki jaka ha kylleng ka ri India ha kaba la sam palat 51,000 tylli ki shithi thung kam.
Lyngba na Rozgar Mela, 12.75 lak ngut ki samla ka ri kila ioh shithi thungkam.
Ia kane ka prokram ha Shillong la pynlong ha State Convention Centre bad la wan shim bynta da u Minister of State for External Affairs and Textiles ka Sorkar Pdeng u Pabitra Margherita bad u Myntri Rangbahduh ka ri u Narendra Modi u la ai jingkren sha ki samla ioh kam lyngba ka video conferencing.
Kine ki 127 ngut ki samla ha Shillong kila ioh pdiang iaka shithi thungkam haki tnat bapher bapher kynthup ha Income Tax, Indian Railways, India Post.
Haba kren sha ki paidbah, u Pabitra ula ai khublei ïa ki samla ba dang shu shah thung kam bad ki bahaïing hasem jong ki bad ka la ong ba ki shithi thung kam kim dei tang ka jingsdang jong ka kam hynrei ka dei ka jingsdang jong ka jingïaid lynti jong ka jingshakri, ka jingkitkhlieh bad ka jingtei ïa ka jaidbynriew bad iaka Ri.
U Pabitra ula pynpaw ia ka jinglah kaba khraw jong ka thain shatei lammihngi bad u la ong ba ka jingpynbha ia ka jingpyniasoh bad ki jingtei ka pli lad iaki samla ban ioh ioh jam ban tei ia ka lawei jong ki hapoh ka thain.
“Ka roi ka par jong ka dong shatei lammihngi ka long kaba kongsan eh na ka bynta ka roi ka par jong ka jaidbynriew bad ki samla kiba dang shu thungkam thymmai ki dei ban noh synniang sha ka lawei jong ka ri India da ka jingaiti lut, ka jinglong ba janai bad ka jingsngew ba skhem ban shakri paidbah, u la ong.
U Myntri Rangbahduh ka ri u Narendra Modi u la ai khublei ïa ki samla ba shah thungkam thymmai bad ki bahaïing jong ki, da kaba kubur ïa ka jingtrei shitom jong ki samla bad ka jingaiti jong ki kmie ki kpa jong ki.
U Myntri Rangbah ula ong ba ki samla kiba rung sha ka kam Sorkar ki don ka bynta kaba kongsan ban pynurlong ia ka jingthmu jong ka Viksit Bharat ha u snem 2047.
U la kyntu ïa ki samla ba shah thungkam thymmaj ba kin shim ïa ki rai kiba pynkhlaiñ ïa ka Viksit Bharat bad ka Atmanirbhar Bharat, da kaba buh ïa ki nongshong shnong bad ki jingangnud jong ki hapdeng jong ka kam jong ki.
Ula ong ba man la ka rai jong ka Sorkar ka dei ban iarap ban weng ia ki mawjynthut bad ban thaw lad ia ki nongshong shnong.
Haba pynpaw ïa ka jingroi jong ka kam bad ka jingseng kam seng jam hapoh ka ri India, u Modi u la kdew ïa ka jingpynroi ïa ka jingsdang jong ka ri, khamtam ha ki nongbah Tier-2 bad Tier-3, bad ka jingkiew ka jingïashim bynta jong ki kynthei bad ki samla ha ka kam seng kam seng jam.
U la pynpaw ruh ia ki jingthmu kiba iadei bad ka jingpynroi ia ki sap, ki jinghikai pyntbit bad ka jingpynmih iaki lad ioh kam ioh jam.
U la ban jur ia ka jingdonkam jong ki rukom thung kam kiba shai, kynthup ia ki eksamin ha ki ktien jong ki thain bad ki lad ki lynti kum ka jinglah ban jied hi ia ki jaka thoh eksamin.
U la kdew ruh ia ka Mission Karmayogi ha kaba palat 1.72 klur ngut ki samla ki la pynrung kyrteng na ka bynta ka jingpule ba kham shakhmat bad ka jingioh shah hikai pyntbit.
Da kaba pynksan ia ka jingsynshar kaba pynshong nongrim ha ki nongshong shnong, u Myntri Rangbahduh u la kyntu ia ki samla ba shah thungkam thymmai ba kin iai pynbha ia la ka sap bad ban sngewthuh ia ki buit bad ki rukom treikam kiba thymmai bad u la ong ba ka jingkhlain ba shisha jong ka Sorkar ka shong ha ka jingshaniah jong ki nongshong shnong.
Haba iawer iaki samla ba dang shu shah thungkam thymmai ban ban bud ia ka nongrim “Nagarik Devo Bhava”, u Modi u la ong ba ka jingshakri ia ki nongshong shnong ka dei ka jingshakri ia ka jaitbynriew.
U la pynpaw ka jingshaniah ba ki nongtrei thymmai kin pyndep ia la ka kamram da ka jingaiti lut, ka jingsngewrit, ka jingtbit bad ka jinglong hok haka kam.
Ia kane ka prokram sam shithi thungkam thymmai la pynlong da ka Ophis Chief Commissioner ka Income Tax, Shillong.
Ha kane ka sngi la wan shimbynta da Chief Commissioner of Income Tax, Shillong Darzakhum Songate, Principal Chief Commissioner of Income Tax, North East Region Ningreirum Longvah bad Principal Commissioner of Income Tax, Shillong K. Meghanath Chowhan.
