Shillong, Nailur 17: Kaei ban jia tharai lada ki briew kiba shong basah ha Shillong ki lah ban iarap ha kaban rai ia kaei kaba donkam ban pynbeit, kaei kaba dei ban pynneh bad kaei kaba ka sor kadei ban long ha ki pateng ban wan?
Kane kadei ka jingmut kaba ha lyndet jong ka Neighbourhoods of the Future (NOTF), ka imlang sahlang kaba lam khmat ia ki kam pynroi ha sor kaba la wanrah sha Shillong da ka Sauramandala Foundation lyngba ka jingialang kaba ar sngi ha ka 25 bad 26 tarik u Nailur.
Ka Foundation kala iawer ia ki bor pyniaid district jong ka East Khasi Hills ban iashimbynta ha ka Shillong Chapter, kaban lum lang ia ki nongialam shnong, ki samla, ki kynhun jong ka imlang sahlang, ki nongwad bniah, ki nongmihkhmat sorkar bad kiwei kiwei kiba donbynta lang ban iakren halor ka sor bad ban wad ia ki lad ki lynti ia ki jaka kiba lah ban leh eiei da ka jingiasnohktilang.
Ka NOTF kala pynpaw ba kadei ka rukom treikam bad kam long satia tang ka prorkam. Kadei kaba la treikam ha ki 13 tylli ki jaka sor jong ka ri India, kaba kynthup ia ka Bengaluru, Mumbai bad Delhi bad ka don ha ka jaka jong ki nongshong shnong ban ithuh ia ki jingeh bad ia ki jingkylla kiba donkam ban leh. Ki riewshemphang, sengbhalang, ki kynhun kiba wad ia ki lad ban pynbeit bad ki nongbei tyngka ki lah ban iarap ban pynkylla ia kitei ki thong sha ki projek kiba lah ban pyntreikam.
Ia ka Shillong, kane ka sienjam kala sdang da kaba leh online ha kaba ki nongshong shnong ki lah ban “Add Your Voice” and “Rate Your Neighbourhood” katkum ka jinglap ka jongki kaba man la ka sngi.
Ka Neighbourhood kan peit bad kan kylli na ki nongshong shnong halor ki mat kynthup ia ka jingsam ia ka bording elektrik, surok, um, ki jaboh bad ki jaka leit painkhana, ki jaka iaidkjat, jingshngain, ki jaka ai jingsumar, jingdheng kali bad ki jaka paitbah. Kan pan ruh ia ki jingmut halor ka jingmih jong kino kino ki jingsngewkhia kum ka jinghap slap kynsan, ka jingshlei um kynsan, ka jingkyrduh um, ka jingma na ka jingtwa khyndew bad ka jingshit kyrang ha ka por lyiur.
Ki nongshong shnong ki lah ruh ban pynsngew ia kino kino ki jingeh, ai jingmut, ban ai ia ka sap ka phong ka jongki kaba ki sngew kordor bad ia kitei ki jingai jingmut lah ruh ban ai khlem da donkam ban pynpaw ia la ka kyrteng.
Ia kane ka sienjam la pynwandur ban lum thup ia ki mat kiba lah ban mih khlem kano kano ka jingleh kaba lah da thmu ne pynwandur lypa na ki lynti iaid bad ki streetlight kiba sniew, ka jingdheng kali ha kano kano ka jaka, ka rukom lum ia ki niut, lad ban iaid bad ka jingshngain.
Kane ka jingialang ha Shillong kan sdang ha ka 25 tarik u Nailur ha ka por 1.30 mynsngi ha Bosco Integrated Development Society (BIDS), Nongshiliang, Nongthymmai.
Ha ka sngi nyngkong yn iatai halor ka Ecosystem Enablers Session da kaba lumlang ia ki kynhun bapher, ki riewshemphang ka thain bad ki nonghikai ryngkat bad ka Youth Circle kaba ki samla pule bad ki samla ki lah ban pynsngew halor ka lawei jong ka Shillong.
Kane ka prokram kan kynthup ruh ia ka “Iathuh Khana”, ia kaba ki nongpyniaid kila ong ba kadei ka rukom pynpaw jong ki Khasi ia ka rukom batai ne jingpynsngewthuh, da kaba wanrah lang ia ki nongialam shnong, ki riewshemphang bad ki samla.
Ha ka 26 tarik u Nailur, kan jam shaphrang na ka jingialang hapoh kawei ka kamra sha ka jingiaid kjat ha ka sor Shillong. Ki nongiashimbynta kin iaid ha kylleng ki bynta jong ka sor bad ki nongshong shnong ban sngewthuh kumno ki paitbah ki shem ia ka jinglong jingman jong ka jaka. Ki mat kiba lah ban kynthup kum ia ka bam ka dih, ki iing kiba rim ha Shillong, ki nongdie madan, ki jingtei pyninam, kali kit um, ka jingdonlang marjan ki jaka khlaw bad ka sor bad ki lynti iaid kiba pyndonkam man la ka sngi da ki nongshong shnong.
Ka jinglap na kine ki jingiakren bad ka jingiaid kjat kan dei kaban sa rah hakhmat jong ki nongbei tyngka bad ki ophisar jong ka tnad Urban Affairs da ka jingthmu ban ithuh ia ki projek kiba lah ban pyntrei bad ban shim ia ki sienjam kiban wan.
Ki nongpyniaid kila pynshlur ia ki nongshong shnong ka sor Shillong ban iashimbynta ha kane wat lada kim lah ban iashimbynta ha katei ka jingialang kaba ar sngi ruh.
Lyngba ka rynsan online, ki paitbah ki lah ban ithuh ia kaei kaba la dkut, ban batai ia kaei kaba ki kwah ban iohi ia ka jingkylla, ban sam ia ki sap ki phong kaba ki lah ban noh synniang ne ban pynpaw ia kaei kaba ki sngewieid eh shaphang ka
Neighbourhood.
Kane ka rynsan ka iawer ruh ia ki nongshong shnong ban phah ia ki briew kaba ka kam kaba ki trei man la ka sngi ka iarap ha kaban pyniaid shaphrang ia ka sor, kynthup ia ki niongdie madan, nongdie dukan, ki nongtam niut, nongniah kali, ki nongtrei bylla sngi, ki nongtrei ha ki kam oh ne thain jingthain lyngba ka sienjam “Faces of Shillong”.
Kan don ruh ka Directory kaba kyrpang ban ailad ia kiba trei kham khaii pateng, ki Freelancer bad ki nongpynbiang ia ki jingdonkam ban pyntip ia ka thup ai jingshakri ka jong ki.
Ka Shillong Chapter kadei kaba la ialam da ka Sauramandala Foundation, Socratus bad Rainmatter Foundation.
Ki nongpyniaid kila ong ba ka jingialang ha u Nailur kadei da ka jingthmu ban sdang ia ka jingiaid shakhmat ban ia kaba pynlong thik tang ia ka jingialang bad ka rynsan online bad ka jingdonbynta jong ka Neighbourhood kadei kaba la khmih lynti ba kan long palat ka jingiaid shakhmat ban ia ka jingsdang.
Na ka bynta ka sor kaba mad ia ka jingieh ha kaba iadei bad ka jingdheng kali, ki niut, um, jingtei, jingpyndonkam ia ka jaka, jingpynthud na ka jingkylla ka suinbneng, kane ka sienjam kan ialeh ban ailad ia ki nongshong shnong ia ka jaka ba kin pynsngew ia ka jingshem kaba man la ka sngi ka jongki sha ka jingiakren shaphang ka lawei jong ka Shillong.
Ki nongshong shnong ki lah ban iashimbynta lyngba ka NOTF Shillong platform: Add Your Voice | Rate Your Neighbourhood
