Guwahati, Nailur 17: Arngut ki pulit kila shah kem ha Sribhumi district jong ka Assam, namar ba ki la pyndonkam ia ka kali kyrkieh jong ka sorkar ban lute ia ka pisa kaba T.14 lak na u nongiarap jong u nongkhaii, da kaba shu ong ba ki la pynlong ia ka jingtalasi.
Uwei u pulit sub-inspector ba la shah kynnoh ba u dei u nongplan ia katei ka kam u dang phet krad.
Katei ka jingjia ka la jia ha ka 10 tarik Nailur, ong u Additional Superintendent of Police (Crime) Sribhumi, u Pallab Jyoti Kalita.
Katkum ki pulit, uwei u nongkhaii na Sribhumi u la aiti ia ka pisa kaba T.25 lak sha u nongiarap jong u ban pynpoi ha Dharmanagar, Tripura.Une u briew u dei uba leit da ka rel bad la bat ia u hadien ba u la poi ha Patharkandi railway station.
Ki pulit ki la kynnoh ba u Sub-Inspector jong ka Patharkandi police station u M. Nongthaiba Singh u la bthah ia u Lance Naik Anwar Hussain bad ia u constable u Sajal Suklabaidya ban leit shaw ia utei u briew da kaba pyndonkam da ka kali 112 jong ka sorkar.
“Ki la ong ia utei u briew ban leit ryngkat bad ki, ki la rah jubor ia u ha kawei ka kali Bolero bad niah bad ialam ia u sha ka thain Chandkhira ha kaba la kynnoh ba u la shah lute haduh 14 lak tyngka”, la ong u Kalita.
Hadien kata utei u lanot u la leit sha ki pulit bad ki pulit kila register case.
U Hussain bad u Suklabaidya naduh katei ka por ki la shah kem, katba u Singh pat u dang phet rieh.Ki pulit ki la iathuh ba ia kawei ka bynta jong ka pisa ba la kynnoh ba la tuh la lap ha ka por ba talasi ia ki iing jong ki briew ba shah kynnoh.
Ha ka por ba kylli jingkylli, la kynnoh ba ki pulit ba la shah kem ki la iathuh ha ki nongtohkit ba u Singh u la thmu ia katei ka kam, u la ialam ia ka kynhun bad u la ai jingtip shaphang ka jingleit jingwan jong ka pisa bad u briew uba rah ia ka.
Mynta ki nongtohkit ki dang wad bniah kumno u sub-inspector u la ioh ia ki jingtip ba bniah halor katei ka jingtransphar ia ka pisa kaba T.25 lak bad la ki don ne em kiwei pat kiba donkti.
“Ngi dang lum lut ia ki jingtip ba bniah baroh, ki jingkren phone bad ki record ha ka por ba ki kren phone bad ka jaka ba ki shah posting.Ia ka jingdonkti jong kiwei ruh la nang bishar bniah.Kane ka long kaba kham palat ban ia kaba shu lute”, la ong u Kalita.
Ki pulit ki la iathuh ba katei ka case ka la pynmih ia ka jingsngewkhia kaba jur halor ka jingkynnoh ba la pyndonkam bakla ia ka bor sorkar bad ia ka kali sorkar na ka bynta katei ka kam runar.
Ia ki arngut ki pulit ba la shah kem la rah sha ka iingbishar bad la phah sha judicial custody. Ki pulit ki la iathuh ba lai ngut ki nongshah kynnoh kynthup ia u Sub-inspector ki dang phet rieh.
