Shillong, Nailur 16 : U Myntri Rangbah Conrad K Sangma ha ka sngi Ba-ar ula ong ba ka jingkynnoh wan lum khana samari ki briew na Assam ha Langpih ka dei kaba la pynsngew sha ki bor Sorkar bad yn sa iakren bad ka Assam lada donkam.
“Ym pat shym la iakren ha ka kyrdan jong nga, hynrei nga la tip ia kane ka jingjia. Ka Tnad Political kala khmih ia ka bad ngi la pyntip ruh sha u Commissioner” ong u Conrad.
U iathuh ba ka Sorkar kala iakren bad ki bor district ba dei khmih bad kan sa tuklar lada ki paidbah ki mad jingeh.
“Lada dei ka jingjia ba dei hok kaba pynlong ia ki briew jong ngi ban nym sngew shngain, ngin sa iakren bad ka Assam ban pynthikna ha kaban pynbeit ia kane ka jingeh” ula ong.
Halor ka jingiakren khappud jong ka wat kaba ar, u Conrad ula pyntip ba ia ka Border Committee yn sa thaw shen ba kin sdang noh ia ki kam.
