Shillong, Nailur 15 : Ka Ri-Bhoi ka la iai bteng ban bat ia ka kyrdan nyngkong ha ka miej ioh khur takma haba kut jong ka sngi kaba ar jong ka Meghalaya State Senior Athletics Championship 2026 hynne ka sngi.
Ka Ri-Bhoi ka la ioh khur 8 tylli ki takma ksiar, 3 tylli ki takma rupa bad 6 tylli ki takma rnong,katba ka East Khasi Hills ka la kiew sha ka kyrdan baar da kaba ioh khur 4 tylli ki takma ksiar, 4 tylli ki rupa bad 1 ka rnong. Kaba la pynhiar ia ka Eastern West Khasi Hills sha ka kyrdan kaba lai bad ia mynta ki la ioh khur 3 tylli ki takma ksiar, 2 ki rupa bad 3 ki rnong.
Ia kane ka jingiakob ba lai sngi la pyniaid da ka Meghalaya Athletics Association (MAA) ba la kyrshan da ka Directorate of Sports and Youth Affairs kaba la pynlong ha Sports Authority of India centre ha NEHU Shillong.
Ka East Khasi Hills ka la wan nyngkong ha ka 4x400m relays jong ki shynrang bad ki kynthei bad kumjuh ha ka 5000m jong ki shynrang, ba la jop da u Daniel L Wahlang. Katba ia ka takma ksiar jong ka 5000m ki kynthei la ioh khur da ka Balasiewdor Pathaw, kaba la tam da shi minit shiteng ia kaba wan baar.
Ki ar tylli ki takma ksiar na ka bynta ka Ri-Bhoi la ioh khur da ka Anrisha Klein ha ka kynthih long jump ki kynthei bad u Banistar Syiem ha ka kawang shot put ki shynrang.
Baroh ar ka 4x100m relays jong ki shyrang bad ki kynthei la wan nyngkng da West Jaintia Hills, katba ka East Khasi Hills ka la wan baar ha baroh ar.
Ki nongialehkai na rilum Garo ruh ki la ioh ban lehkmen, hadien ba ka Tushal M Sangma ka la ioh khur takma ksiar na ka bynta ka North Garo Hills ha ka kawang sum ne javelin jong ki shynrang. Ka Dilme Ch Marak jong ka South Garo Hills ka la wan nyngkong haka ka kawang discus ki kynthei bad ka Nokme Ch Sangma (ma ka ruh na SGH) ka la jop ia ka kawang sum javelin jong ki kynthei. U Eliam Bonkam G Sangma u la ioh khur ia ka takma ksiar kaba nyngkong na ka bynta ka South West Garo Hills haka kynthih long jump ki shynrang.
Ha kajuh ka por ka Tengsilchi B Marak ka la jop ia ka mareh 400m ki kynthei katba u Lastly Surong u la wan nyngkong ha ka 400m ki shynrang na ka bynta ka East Jaintia Hills.
Baroh ki district ki la ioh khur mar kawei ka takma na kine ki ar sngi jong kane ka championship. Ki dangsah sa katto katne ki jingiakob ba kin iakhun ha ka sngi kut, kata ha ka sngi Balang. Ka jingiakhun jong ki kan long ruh na ka bynta ban ioh mih khmat ia ka 39th National Games kaban long ha ka jylla la shem snem.
