Imphal, Nailur 15: Ar ngut ki kynthei riewlum, ki la shah siat iap bad katto katne tylli ki iing ba shong rep, ki la shah thang ha ka shnong Leisang Kuki ha Jiribam distrik, ha ka noh phai sngi jong ka sngi Ba-ar, ha ka jingiakynad kaba thymmai u pud u sam jong ka Jiribam-Tamenglong.
Kane ka jingshah thombor ka la nang pynjur shuh shuh ka jingtieng hapdeng ki nongshong shnong bad ka la mih ka jingsngewkhia ba thymmai halor ka jingshngaiñ jong ki riew paidbah kiba sah ha kane ka thaiñ.
La iathuh ba kitei ki lanot, ki la shah thombor ha ka por ba ki dang trei ha ki jaka rep jong ki, ha ka por kumba 3 baje janmiet ha ka thain Leisang-Muktokhal.Ki tyllong khubor na ka thain ki iathuh ba katto katne ngut kiwei pat ki nongshong shnong kiba la leit sha la ki jong ki jong ki jaka rep khlem lap dien hadien katei ka jingjia.
Kitei kiba la khlad noh ki dei kiba la tip kyrteng kum ka Chonga Sitlhou, 60 snem ka rta, ka kurim jong u Seidou Sitlhou ba la khlad noh bad ka Kimboi Singson, 30 snem ka rta, ka khun jong u Paosei Singson.Baroh arngut ki dei ki nongshong shnong jong ka shnong Leisang.
Katkum ka jingiathuh jong ki nongshong shnong, la ong ba ka Chonga Sitlhou ka dang lum dieng thang ha ka jaka rep jong ka haba ka la shah thang ha ka ding.
Ka Kimboi Singson kaba dang shu pyndep ia ka jingpule nurse bad kaba la wanphai sha la iing ban iarap ia la ki kmie ki kpa ha ka rep ka riang ruh ka la khlad noh ha katei ka jingshah thombor.
Ki don katto katne ki iing rep kiba don ha katei ka thain bad sawdong jong ka thain kiba la shah thang, kaba la pynmih ia ka jingsngewkhia halor ka jingpynjot ia ki mar ki mata jong ki riew paidbah bad ki jaka rep.
Ka jingdon jong ki briew kiba jah bad ka jingkheiñ ba khatduh jong kiba la mynsaw kam pat shai bha ha ka por ba ujor, ha kaba ki jingtip na katei ka jaka ba jngai ki dang mih.
Ka jingjia kaba thymmai ka la jia tang hadien ar sngi hadien ba saw ngut ki riew lum, kynthup ïa ki shijur, ki la ïap ha ki jingshah thombor ha ka shnong Tollen ha Tamenglong District bad ka shnong Longpi ha ka Noney District ha ka 13 tarik u Nailur.
Kito ki jingshah pyniap ki la pynmih ïa ka jingpynrem kaba jur bad ka jingdawa ban tohkit da ka tnad National Investigation Agency (NIA), ryngkat bad ki lad jingïada kiba kham khlaiñ na ka bynta ki jaka shong jaka sah ki rit paid.
Ka jingshah thombor kaba thymmai ha Leisang ka la pynjur ïa ka jingsngewkhia halor ka jingshngaiñ jong ki nongshong shnong kiba sah shi lynter ka thaiñ Jiribam-Tamenglong, khamtam kito kiba shaniah ha ki lyngkha rep kiba jngai na ka bynta ka kamai kajih jong ki.
Wat hapdeng ki jingsngewkhia ha kaba iadei bad ki bor pahara kiba dang iai bteng, ki nongshong shnong ki hap ban leit sha ki jaka rep ban pyndap pynbiang ia la ka iing ka sem.Ka jingshah thombor kaba dang shen ka la pynpaw biang ïa ki jingma kiba ki riew paidbah ki ïakynduh kiba rung sha ki jaka rep kiba jngai hapdeng ka jingïakynad kaba dang ïai bteng.
Ka khubor ba la thang ia ki iing rep ka la pynmih ruh ia ka jingsngewkhia halor ka jingim jong ki longiing kiba la shah ktah lypa ha ka jingia um snam kaba la slem.
Ki jingpyniap briew ki lah ban pynjur ïa ki jingdawa na ki seng Kuki-Zo ban pynkhlaiñ mardor ïa ki bor pahara, ban ïada ïa ki jaka shong jaka sah ba shong ki rit paid, ban tohkit ha ka por bad ban leh tyngeh pyrshah ïa kito kiba donkti.
Ka jingbud ryntih jong ki jingshah thombor ha Tollen, Longpi bad mynta ha Leisang ka la pynjur ïa ka jingtieng ïa ka jingshah thombor kaba kham jur ha kylleng ki jaka shong jaka sah ki rit paid, ha kaba ki riew paidbah ki dang ïai bteng ban kit ïa ka jingeh jong ka jingïakynad.
