Shillong, Nailur 15: U nongialam ka Meghalaya Bharatiya Janata Party (BJP) uba dei ruh u MLA ka Pynthorumkhrah constituency Bah AL Hek u la ong ba ka jingthmu ban pynkynriah ia ki 342 tylli ki longiing na Them Iew Mawlong ka dei ban long thik tang ia ki ba dang trei haki tnat treikam Sorkar katba ia ka Gurudwara ym dei ban pynkynriah kum ka jingburom markylliang iaka niam bad jingngeit.
U Bah Hek u la iathuh ba u la dep rah teng ia kane ka mat naduh ka por ba dahg long Myntri Rangbah u Dr Mukul Sangma.
“Naduh kham mynshwa, shwa ka Sorkar ba la ialam da u Conrad K Sangma, ha ka por jong ka Sorkar u Dr Mukul ruh nga la rah ia kane ka mat. Ha ka por jong u Conrad ruh, nga la iai bteng ban tynruh ba dei ban pynkynriah noh iaki ba sah ha Them Iew Mawlong” la ong u Hek.
U Bah Hek ula pynkynmaw ba haka por ba u bat kum u Myntri ka tnat ka Koit ka Khiah, u la tyrwa ban ai jaka sah ïa ki nongtrei ka tnat kiba sah ha Them Iew Mawlong ha ki jaka sah (Quarter) jong ka tnat.
“Kito kiba trei ha ki tnat Sorkar kum ha ka Municipal, ka tnat ka Koit ka Khiah bad ki tnat bapher bapher. Ha ka por ba nga dang long Myntri ka tnat ka Koit ka Khiah, nga la ong aiti noh ha nga ia baroh kito ki nongtrei kiba trei ha ka tnat ka Koit ka Khiah, ngin ai jaka sah ia baroh kiba sah ha Them Iew Mawlong. Ngi la long kiba la khreh ha kito ki por bad ngi la long kiba la khreh wat mynta ruh” u la ong.
Halor ka jaka mane blei kaba don ha Them Iew Mawlong, u Bah Hek u la ong, “Lada ki ong ba ki kwah ban kynriah, ngim kwah ban kynriah ia ka Gurudwara. Ka jaka mane ka dei ka jaka mane. Ngi dei ban burom ia kawei pa kawei ka jingngeit. Lada u Hindu u don la ka jong ka jingngeit, ngi hap ban burom, la ka long Khristan ne Muslim, ngi hap ban burom ia kata ka jingngeit baroh.”
U Bah Hek u la ong ba ka BJP ka kloi ban iarap ia ka Sorkar Jylla ban ioh jaka na ka Ministry of Defence ban ioh jaka ban pynkynriah iaki briew na Them Iew Mawlong hynrei ka pyrshah pat ban ai jaka sah iaki briew ki bym don ki nongtrei jong ki tnat treikam Sorkar.
“Ngin iarap ruh ia ka Sorkar ban ioh jaka na ka Ministry of Defence ka SorkarPdeng. Dei ban ai jaka ban pynsah ia ki, hynrei ki dei ban long tang kiba dang dei ki nongtrei haki tnat treikam Sorkar. Kam lah ban long ia kito ki bym dei ki nongtrei Sorkar ban dawa jaka sah naka Sorkar, ngin nym pdiang ia kata. Lada ai jaka, ka dei ban long tang na ka bynta kito kiba dang don ha ka kam Sorkar” u la bynrap.
