Ka Hid Foundation Shillong ka wanrah da ka jingtyrwa bathymmai sha ka Sorkar Jylla Meghalaya, ha ka Tnad Sports & Youth Affairs, na ka bynta ban kyntiew ia ki kam ïalehkai ha ki nongkyndong bad kaba kynthup lang ia baroh ha ka Jylla, khnang ba ka jingpynroi ia ki kam ïalehkai kan long kaba neh slem.
Ka Hid Foundation Shillong, ka lah tyrwa sha ka Sorkar Jylla ban sdang ia ka prokram thymmai ka ban tip kum ka Meghalaya Sporting through Action, Resilience and Knowledge (M-SPARK) lane ka Chief Minister’s Inclusive Sporting Program through Action and Knowledge (CM-ISPAK). Ka Sorkar ka lah ban jied ia kano kano na ki kyrteng ba la tyrwa ne ka lah ban buh da kano kano ka kyrteng kat kum ka jingsngewbit jong ka sorkar ban pyniaid shakhmat ia kane ka prokram.
Ia kane ka prokram lah wanrah bad tyrwa sha ka sorkar jylla , ba kan pyntreikam ha ka Jylla baroh kawei lah ban long lyngba ki Deputy Commissioner bad ki District Sports Officer jong ki district bapher bapher hapoh jylla Meghalaya.
Ka jingthmu kaba kongsan eh jong kane ka prokram ka long ban kyntiew ia ki kam ïalehkai ka ban kot shaduh shatrai (grassroot) khamtam ha ki nongkyndong bad ban peit kyrpang kumno ban lah ban pynroi ia ki sap ïalehkai naduh ka jaba sdang hi, kum ha ki skul, bad ban kyrshan ruh ia ki kam ïalehkai ha ki shnong bapher bapher ha ki jait jingïalehkai bapher bapher khamtam ia ki khynnah rit kiba don sap.
Hapoh ka M-SPARK / CM-ISPAK:-
1. Kawei ka Skul, Kawei ka jaka ïalehkai
2. Ka Bank jong ki tiar ïalehkai ha man ka skul
3. Uwei u nongvolunteer ïalehkai na ka bynta man la 3 haduh 5 tylli ki skul
4. Ki jingïalehkai hapdeng ki skul man la ka lai bnai
5. Ban kham pynleit jingmut sha ki samla nongkyndong bad ki khynnah Divyang
6. Ban kyrshan ia ki jingdonkam kiba rit ha ki nongkyndong
Ka Hid Foundation Shillong, ka lah wanrah ia kane ka jingtyrwa hadien ba ka lah iohi kham bha ki jingshisha ha kylleng ki jaka jong ka jylla.
Ka Hid Foundation Shillong, ka la kyrpad ia u Myntri Rangbah ba don burom u Conrad K. Sangma, bad ia u Myntri uba dei peit ia ka Tnad Sports & Youth Affairs Wailadmiki Shylla bad ia ka Sorkar hi baroh kawei ban bishar bniah ia kane ka jingtyrwa kaba donkam bha.
