Shillong, Nailur 14: Ka jingmad jingeh ka Sor Shillong na ka jingdheng kali bad ka jingkyntur pud ia ki lynti iaidkjat mynta ka lah ban pynsuk noh, haba ka sorkar jylla kala dep pynkynriah ia 785 ngut ki nongdie madan ha ki jaka kiba kongsan sha ki 6 tylli ki jaka kiba kyrpang na ka bynta ki nongdie madan hapoh sor.
Kane ka jingpynkynriah, ki ophisar kila ong, ba kila leh ryngkat ka jingiasyllok bad ka Provisional Town Vending Committee da kaba buh ha ki jingmut jingpyrkhat ia ka suk ha ka leit ka wan jong u paitbah bad ia ka bha ka miat jong ki nongdie madan.
Katkum ka jingong ki ophisar, ia kane ka jingpynkynriah la leh naduh u snem uba la snem uba la dep.
Kala sdang na Khyndailad, ka jaka kaba khapngiah tam ha ka nongbah kaba dei ka shlem jong ka khaii pateng, ha kaba 387 ngut ki nongdie madan la pynkynriah sha ka MUDA Parking Lot ha ka 23 tarik u Naitung 2025.
Hadien kane la pynkynriah ia ki nongdie madan na MTC, Jail Road bad Polo sha ka Polo Hawkers Market bad ka SMB Parking Lot kaba don mar pyrshah ia ka SBI Main Branch ha ka 28 tarik u Naitung 2026.
Ka wat kaba khatduh la pyndep ha ka 17 tarik u Nailur 2026, ha kaba ki nongdie madan ha Laitumkhrah, Dhankheti, Malki, Barik, Laban bad Last Stop la mang jaka kyrpang ia ki ha Brightwell Campus Hawkers Market bad ha SMB Parking Lot, Dhankheti.
Baroh kitei ki 785 ngut ki nongdie madan mynta ki lah shong die jingdie ha ki 6 tylli ki jaka, 387 ngut ha MUDA Hawker Market, 138 ha Brightwell Campus, 119 ngut ha Polo Hawker Market, 75 ngut ha SMB Parking Lot mar pyrshah ia ka SBI, 37 ngut ha SMB Parking Lot Dhankheti bad 29 ngut ha PWD Campus, Barik.
Ki ophisar kila pyntip ba kine ki nongdie madan kiba la ioh jingithuh kila ioh ia ka jingkyrshan kaba T.20,000 hapoh jongka Chief Minister’s Urban Livelihood Grant kum ka jingai jingiarap ia ka jingpynkynriah jaka die ia ki.
“Ka jingthmu ka long ban pynthikna ba kan don ka rukom pyniaid kali kaba biang, ban pynsuk ia ka iaid ka ieng jong ki paitbah, ban lah ban pyndonkam bha ia ki jaka paitbah bad ban iada ia ka jingkamai jakpoh jong ki nongdie madan lyngba ki jingai jingkyrshan bad jingai jingiarap da ka song tyngka” la ong ki ophisar.
