Shillong, Nailur 14 : U Myntri Rangbah Conrad K Sangma ha ka sngi Nyngkong, ula ong ba ka rai jong ka Sorkar ban pynkynriah ia ki nongshong dukan madan sha Dhankheti bad Barik ka dei ka sienjam ban sah khana bad kaba jop ha kaban pynbiang tarajur ia ka jingitynnad ka sor bad ka jingshngain ka kamai kajih.
U Myntri Rangbah, bala synran da u Myntri Sorkar Bah Sanbor Shullai bad ka nongaibuit ka Sorkar bad MLA ka East Shillong Kong Ampareen Lyngdoh, ula pynpaw ia kane hadien ka jingsam ia ki cheque sha ki nongshong dukan madan kiba la kynriah sha Brightwell Bungalow.
Haba iaroh ia ka jingiatreilang bad baroh ki kynhun ba don bynta, u Conrad ula ong “Nga kwah ban ai khublei ia ka Municipal bad ka Tnad Urban lem bad ki MLA jong ngi bad ia ki nongshong dukan madan kiba la lah ban pynurlong ia kane mynta ka sngi. Kane kan ym lah ban long khlem ka jingiatrei lang bad baroh ki kynhun ba don bynta ha kane ka kam”.
U Myntri Rangbah ula kubur ba ka jingpynkynriah ka long kaba kyllain bha ban ia kaei kaba paw.
“Kane ka lah ban I kum ka kam kaba rit, hynrei ka dei kawei na ki kam kiba eh tasam bha kaba ngi la mad. Kam dei satia tang halor ka roi ka par, ka iasnoh beit beit bad ka kamai kajih jong ki briew bad ka jingitynnad jong ka sor baroh kawei” ula ong.
U Myntri Rangbah ula kren kyrpang halor u Symbud Myntri Rangbah ba khmih ia ka tnad Urban Affairs uba la pynlait ia ka jaka sah jong u na ka bynta ban ai jaka ia ki nongshong dukan madan.
“Ka jaka ba ngi ieng mynta, ka Brightwell Bungalow, ka dei ka jaka sah jong u Myntri ka Tnad urban Affairs. Ka kamai jakpoh ki briew jong ngi ka kham kongsan ia ngi bad kumta, watla ka mut ba u Myntri un hap ban aiti iala ka jong ka jaka sah na ka bynta ki nongshong dukan madan, ula leh ia kata. Nga ai khublei ia ka jingsbun jong u bad ka jingkylluid mynsiem jong u” ong u Conrad.
Ula ong ba ki jaka Sorkar kiba don kongsan eh ha kylleng ka sor lah ai sha ki nongshong dukan madan khnang ban pynthikna ba ki surok kin long ki ba lah ban iaid bad ba khuid khlem da ktah ia ka kamai kajih jong ki.
Haba kyrpad ia ki paidbah ban kyrshan ia kine ki nongshong dukan madan bala kynriah, u Conrad ula ong “Baroh ki khynnah pule, ki nongjngohkai bad ki nongshongshnong ki dei ban leit sha kine ki jaka shong dukan madan. Kan long kaei kaei kaba pher bha. Kala kylla long kum ka imlang sahlang kaba rit bad kaba iatreilang na ka bynta ban kamai jakpoh man ka sngi”.
U Conrad ula pyntip ruh ba ka Sorkar ka thmu ban kyntiew kyrdan ia kine ki jaka shong dukan madan da kaba buh ia ka rynsan iaput iatem ha ka por janmiet, ki jaka leit bar, ki jaka shong, ki jingshai ba la pynitynnad khnang ban ailad ia ka jingshong dukan palat ia ka 7-8 baje janmiet kat kum ki kynta bala shah.
Kum ka dak ka jingai jingiarap, ka Sorkar kala sam mar T.20,000 sha kine ki nongshong dukan madan ba kynthup ia T.10,000 bala aiti noh bad T.2,000 ka ban sa ai man la u bnai.
