Shillong, Nailur 10: Haba kyntait ia ki khubor ba mut leit iasoh sha ka BJP, u MLA ka TMC Mizanur Rahman Kazi u la ong ba ki MLA ka party ki dang iatylli bad um pat shim satia ia kano kano ka rai ban pyniasoh bad kano kano ka party.
Kane kala mih namar ba mih ki khubor ba 4 ngut ki MLA ka TMC bad 9 ngut na ki 12 ngut ki MLA ka UDP ki dang pynkhreh ban rung sha ka BJP.
Haba jubab ia kane, u Kazi u la ong, “Ki don shibun ki khubor bad ki jingthoh ha ki social media, bun ki leh ia ka na ka bynta ban kiew ka TRP. Haba iadei bad ka TMC ngim pat shim ia ka rai. U nongialam jong ka CLP jong ngi um shym la khot ia kano kano ka jingialang ban iakren ia kane ka mat. Kumba ka long mynta, ngi dang iaineh bad ka TMC. Ngim tip shaphang ka ban sa wan hynrei mynta ngi dang dei beit TMC”.
Haba kylli hato la wan tyrwa ne em ka BJP, u la ong ba ki nongtyrwa ki ju don ha ka sain pyrthei.
“Kin don shibun ki nongwan khot sngewbha. Kaba kongsan ka dei kaei ka jubab phin ai. Ngim shym la jubab ei ei, bad kata ka long kaba kongsan,” u la ong.
