Shillong, Nailur 10: Ka Rangdajied United FC joit ki la kyntiew ia la ka rukom ialehkai kampher wat hadien ba ki la shah tam lypa shakhmat da shi kol, hynrei kala beh sha ka thong ban jop ia ka Laitkor SC da 3-1, ha ka Shillong Premier League 2026, hynne ka nohphai sngi ha SSA Stadium.
Marsien dang ka jingiakhun, ka Laitkor SC kaba la ialehbha bad kala ioh ban pynkhih ia ka jar ba nyngkong ha ka minit ba 32 lyngba u Hamingbert Nongbet.
Ka Rangdajied United FC kam lah satia ban shu ia pein tang da ka nam ban shu iakhaid klet noh ia ka namrem, hynrei kaei ba ki donkam ka long ka jingjop.
Kumta wat hadien ba la shah tam shwa shakhmat da shi kol, ka kynhun ka la kyntiew ia la ka jong ka rukom ialehkai bad suki pa suki katba nang jam shaphang ka jingiakhun, ki la lah ban tehlakam ia ka rukom ialehkai ka jong ki.
Haba wan ban bteng ia ka kylla miet, hadien bala spel lyndet ia ki jingduna ka Laitkor SC, ki rang ialehkai ka Rangdajied ki la sdang ban shim ia ki kabu ksiar bad ioh ba thep ia kitei ki lai tylli ki kol kiba la wan lyngba u Franky Dkhar (53’), Mebannangkiew Thabah (73’) bad Pasborlang Khonglikong (88’).
Da kane ka jingjop, ka Rangdajied kan lait na u line saw (relegation zone) ban kiew sha ka kyrdan ba 7 bad ban khynniat pat ia ka Nongkseh SSCC sha ka kyrdan kaba 8 bad ka Laitkor SC kan hiar sha ka kyrdan ba 9.
Haba iadei bad kane ka jingjop, ka nam ialehkai ba bha ka leit sha u Meshan ka Rangdajied, namar kum u rang ap kol u la lah shisha ban ieng ban kyrda (save) tang da la ki jong ki shimpriah kti ki jong u, ia artylli ki bol kiba tikna ban urlong sha ki kol ha ki minit ba kane ka jingiakhun ka la khreh ba kan jam noh artad sha kaba kut.
Lashai pat ka sngi, ki khmat baroh yn hap ban ia phai pat sha ka jingiakhun kaban long hapdeng ka Nongkseh SSCC pyrshah ia ka MLP FT, kaba la buh ban sdang ha ka por 3:30 nohphai sngi, kaba resol hi kan ai ruh ia ka rai ia kine ki ar kynhun ha ka jingioh ban iuh kjat ka jong ki ban iakhun ha kane ka lympung jong ka SPL mynta ka samoi.
