Shillong, Nailur 08: Ka jingshakri jong ki Nurse ha North Eastern Indira Gandhi Regional Institute of Health & Medical Sciences kan bteng kumba ju long hadien ba ka NEIGRIHMS Nurses Association (NNA) ka la mynjur ban pynkynriah ia ka rai ban shim shuti paidbah da hynniew sngi.
Ka Association ka la pynbna ban shim shuti paidbah naduh ka 9 tarik u Nailur ban pynbor iaki bor pyniaid ba kin pyntreikam ia ki mat jingdawa hynrei ka la rai ban pynsangeh noh shuwa hadien ka jingialang bad ki bor pyniaid ka Institute.
Ha ka kyrwoh, ka NNA ka la ong ba ki pyniaid ka NEIGRIHMS ka la pan por shi taiew ban rah ia ki mat sha ka tnat Ministry of Health and Family Welfare (MoHFW) shwa ban pynlong ia ka jingialang jong ka Governing Council
Ka NNA ka la ong ba ka jingpynkynriah shipor iaka jingshim shuti paidbah ka long ban ailad ia ka jingiakren hynrei ka la kren shai ba kam pat weng satia iaki mat jingdawa.
Ki jingdawa ki kynthup ïa ka jingthungkam noh haki kam ba Nursing Officer ba lait thylli, ban weng noh ïa ka jingtyrwa ban shim nabar ia ki Nursing Officer, ban pyntreikam ïa ka MoHFW Office Memorandum jong ka 30 tarik Jymmang 2026, bad ban pynlong kloi ïa ka eksamin thung kam.
Ka la maham ba lada kam don kano kano ka sienjam ka ban pynhun iaki mat jingdawa hapoh shi taiew, ka Association kan pynïaid shakhmat iaka jingiakhih da kaba sangeh treikam khlem pud sngi naduh ka 17 tarik Nailur.
