Bun ki nongialam kila ioh pdiang ia ki notice
Shillong, Nailur 08 : Ka Khasi Students’ Union (KSU) ha ka sngi Ba-ar kala kynnoh ba ka don ka jing leh shiliang ha ka jingkem briew ki Pulit hadien ki jingjia thombor ba mih na ka rally thuk thuk ba long ha ka 19 tarik Nailar.
U General Secretary barim ka KSU samla Donald V Thabah ula iathuh ba bun ki nongialam bad ki dkhot jong ka Seng kila ioh pdiang ia ka show cause notice bad la shu kem khlem nongrim.
“Bun kila ioh pdiang ia ki notice. Arngut ki dkhot ka KSU kila ioh notice ba iadei bad ka jingtei beain hapoh ka headquarter ka CBI ha Shillong. Hadien ba ki shah khot hajir ha kane ka case, kila shah kem ha kawei pat ka case. Ia uwei la pynlait noh namar ba um shym la don bynta ha ka rally. Kumta, ngi sngew ba ka don ka jingleh bakla hapoh ka tnad Pulit bad kane ka dei ka jingleh shiliang haba iadei bad ka jingkem khlem nongrim” kynnoh u samla Donald.
Haba buh jingkylli ia ka jingbym leh eiei ki Pulit ia kito kiba pynthut ia ka public hearing na ka bynta ka project ka Shree Cement Ltd ha East Jaintia Hills, ula ong ‘Lada ki lah ban kem ia ngi, balei kim lah ban kem ia kito kiba pynthut ia ka public hearing ka Shree Cement, kum ia kito ki briew kiba kawang maw bad kito kiba tih ia ka surok markhmat ki Pulit bad ki bor district”.
U pyntip ba ka KSU East Jaintia Hills bad ki nongshongshnong ka Elaka Nongkhlieh kila ujor ia ka ejahar bad ka Crime Branch hadien ba kut noh ka jingaipor ba lai sngi ha ka sngi Ba-ar.
“To ngin peit la ki Pulit kin leh eiei ne em pyrshah ia kito ki briew kiba pynthut ia ka public hearing” ong u samla Donald.
Ula bynrap ba kum kane ka jingkem kan ym pynkynran dien ia ka KSU ha ka ban ieng ialeh na ka bynta ka bit ka biang u paidbah.
Haduh mynta, san ngut ki nongialam ka KSU kynthup u President samla Raymond Kharjana, Vice President samla Pynkmenlang Sanmiet, bad General Secretary samla reuben Najiar kila shah kem haba iadei bad ki jingjia thombor ha ka 19 tarik Nailar, kaba wanrah ia ka jingshah thang artylli ki kali, shah pynjulor 31 tylli ki kali bad shah shoh 18 ngut ki briew.
