Shillong, Nailur 08 : Ka Khasi Students’ Union (KSU) kala ong ba kam pyrshah satia ia kano kano ka sorkar kaba trei na ka bynta ka jingmyntoi jong u paidbah ha ryngkat ka jingiatreilang bad ki shnong ki thaw.
“Ngin ym pyrshah ia kano kano ka Sorkar kaba wanrah jingmyntoi lyngba ka jingiatreilang bad ki Shnong. Kaei kaba ngi pyrshah ka long haba ka Sorkar ka iuhroit bad knieh jubor ia ka hok u paidbah” ong u Environment Secretary ka KSU-CEC samla Shiningstar Kharbihkhiew.
Ula kren ia kane hadien ka jingpynbam smai ia ki nongkitkamba thymmai jong ka KSU Mynkrem Unit ha shnong Mynkrem, West Jaintia Hills ha ka 7 tarik Nailur.
U samla Shining ula ong ba ka KSU kala wan shakhmat tang haba don ka jingpynthut ia ka jingmyntoi bad ka suk ka sin u paidbah da ki kam jong ka Sorkar.
Ula ai jingmut ia ki samla ba kin kiar ia ka iashongkha khynnah bad ban pyrkhat ia ka jinglong kmie kpa tad hadien bala biang ka kam ka jam, haba pynpaw ba ka jingiashongkha khynnah kan lam sha ka jinghiar arsut ka Jaidbynriew.
U Information & Publicity Secretary ka KSU samla Pynshai Kupar Dkhar ula kyntu ia ka Unit ba kan trei shitom.
“Ha kane ka pyrthei, ki don lai tylli ki kynhun- kito kiba shu peit ia kaei kaba jia ha ka imlang sahlang, kito kiba lah ban leh eiei bad kiba bun ki bym tip ia kaei kaba jia. Phi dei ban long napdeng kito kiba iohi bad leh eiei na ka bynta ka imlang sahlang” ula ong.
Ia kane ka jingialang la pyniaid da ka General Secretary ka KSU-WJH samla Leningrad Tariang bad iashimbynta da u President ka KSU-WJH samla Laitphar Syngkrem, Finance Secretary ka KSU-EJH samla Shaniahskhem Dkhar bad kiwei kiwei. Kane ka Mynkrem Unit ka hap hapoh ka Laskein Circle.
