Shillong, Sept 7: Ka rukom suh shrong ia ki jain tynrai kaba la tip kum ka Khneng, kaba la leh naduh ki 200 snem mynshwa ha ka shnong Mustoh, East Khasi Hills, kala ioh jaka ban pyni nam ha ka bynta ka tdong jong ka liengsuiñ Air India Express kum shi bynta jong ka #TalesOfIndia initiative.
Ka Air India Express, ha ka rynsan social media, kala pynpaw ba ka Khneng kadei ka jingthain tynrai ki jaidbynriew Khasi jong ka Meghalaya, ha kaba ka rukom suh bad ka jingoh shrong ka pyninam ia ka kolshor ba riewspah kaba naduh hyndai hynthai jong ka thaiñ.
Ia ka Khneng la pynwandur ha kata ka rukom suh ha ki bynta jong u pud jong ka jain da kaba suh da ka kti ia u ksai ryndia. Ka kyntien Khneng ka mut “border” ne khappud ha Khasi bad kdew ia ka rukom buh ia ka rukom suh ha ki jain, kynthup ia ka jaiñpeïn.
Kane ka rukom pynwandur kadei kaba la pawnam ha ka rukom oh shrong kyrpang ban pynitynnad, kynthup ia ka jingbuh ia ki mawkordor bad kiwei kiwei ryngkat bad ki ‘Motif’ kiba la pynshlur lyngba ki jingthung bad ki jingim ki bapher bapher. U Ktiar udei u bynta uba la ioh ia ka jingpynshlur na u khniang Ktiar.
Ka Khneng kadei ka rukom suh jain kaba kyrpang da ki nongthain bad ki nongsuh jain tynrai bad kam dei satia tang ka jingpynwandur ha ka jain hynrei kila khein thik pa thik ia ki ksai ban bting lynti ia ka jingsuh, kaba ailad ia ki ban thaw ia ka rukom suh bad ka jingpynwandur ryntih ia ki shrong.
Kumba ju leh tynrai hi, ha kane ka rukom suh la pyndonkam da u ksai wul uba iong ne da u ksai kynphad uba rben pyrshah ia u ksai ryndia ia kaba la tip ruh kum ka jain ryndia.
Na Mustoh sha Suiñbneng
Ka Mustoh kadei kaba don ia ka jingiadei bha bad ka Khneng mynta da ki pateng la pateng. Kane ka rukom suh kala mad pat ia ki jingtynjuh na ka jingduna jong ki nongsuh, kaba la pynlong ia ki ban shim ia ki lad ban ialeh ban pynneh pynsah bad ban kyntiew ia kane ka rukom suh tynrai kaba long kaba kongsan bha.
Ka jingpynrung ia ka ha ka Air India Express’ Tales of India Series, kala pyninam ia ka jingsuh tynrai ka Meghalaya, ryngkat bad ka jingpynwandur kyrpang jong ki Khasi, mynta haba leit ba wan da ka liengsuiñ na kawei ka jaka sha kawei pat.
“Ha ka bynta kaba sha trai duh jong ka liengsuiñ, kane ka pyni ia ka jingthain kaba long shi bynta jongka #TalesOfIndia, kaba rah ia ka bynta kaba im jong ka riti dustur kaba dang im jong ka Meghalaya sha ka lynti iaid kaba thymmai, la pynpaw ka kad liengsuiñ.
Kane ka sienjam kala pyni ruh ia ki rukom thain tynrai na kiwei ruh ki bynta jong ka ri India, da kaba pyndonkam ia ki ban pyninam ia ka kolshor ba riewspah bad kaba naduh hyndai hynthai.
Ia ka Mustoh bad ia ka jaidbynriew Khasi, ka Khneng ha ka liengsuiñ jongka Air India Express ka long kum ka rynsan ha ka ri ban pyninam ia kane ka rukom suh tynrai ia kaba la leh ha East Khasi Hills mynta lah palat ia ka 200 snem.
