Guwahati, Nailur 5: Ki Pulit Assam ki la kem haduh 330 ngut eiei ki briew ha ka jingkhynra kaba jur ha ka jylla baroh kawei kaba la thmu beit ïa ki nongleh thok, ki nongdawa pisa bad kiwei kiwei kiba la kynnoh ba ki pynthut ïa ka kam aiñ.
U Director General of Police ka Assam u Harmeet Singh u la ïathuh ba kane ka jingkhynra ka la sdang ha ka por kumba 3 baje mynstep jong ka sngi Saitjaiñ bad ka dang ïaid shakhmat ha ka por ba u kren sha ki lad pathai khubor ha Assam Police Headquarter ha Guwahati.
Ïa kane ka jingkhynra la sdang hadien ka jingbthah bad ka jingpynïaid jong u Myntri Rangbah ka jylla u Himanta Biswa Sarma, la ong u DGP.
Katkum u Singh, ki pulit ki la pyndonkam da ka jingpeitngor bad jingpeit bniah ba stad ban wad ïa ki briew kiba la kynnoh ba ki donkti ha kam thok, dawa pisa, khaïi ïa ki mar tuh bad khanglad ïa ki nongshong shnong ban leit sha ki pulit da kaba tyrwa pisa ban pynbeit hi dalade ïa ki mukotduma.
Da ka jingkiew jong ka jingleh thok lyngba ka cyber-enabled, la kynnoh ba katto katne ngut ki nongshah suba ki treikam lyngba ki lad pyntip bad ki lad phah khubor.Ki pulit ki la pyndonkam da ki jingtip ba stad ban ithuh bad lap ïa ki, la ong u DGP.
U Singh u la ong ba ïa kawei pa kawei ka case yn sa bishar kyrpang bad ki pulit ki la lum ruh ia ki jingtip kiba kdew sha ka jingdonkti jong ki katto katne ki kynhun runar.
Napdeng kiba shah kem ki don ki briew shimet kiba la kynnoh ba ki ak kum ki nongiasaid ain bad ki pulit ban pyntieng, thok ban pynshitom ïa ki nongshong shnong, khamtam ïa ki bynta kiba rit paid ha ka imlang sahlang.Ki pulit ki la lap ruh ïa ki case ha kaba la kynnoh ba ki suba donkti ki pyndonkam ïa ka kyrteng jong ki heh sorkar bad ki ophis ban thok ïa ki briew.
U DGP u la ong ba ka jingthmu kaba kham heh jong kane ka jingkhynra ka long ban ïada na ka jingleh thok bad pyntieng pynsmiej bad ban pynthikna ba ki nongshong shnong kin lah ban leit sha ki pulit bad ka ain khlem da shah ïalam bakla ne shah byrngem ha ki ksiang.
U la pynshai ba ka jingkheiñ kaba 330 ka dei kaba shipor, ha kaba ïa ki jingtip ba bniah katkum ki district yn sa pynmih hadien ba la dep ïa ki jingkem bad kiwei kiwei ki jingtohkit aiñ.
Ka jingkhynra ha baroh kawei ka jylla ka dang ïaid shakhmat, bad la khmih lynti ba kan don shuh shuh ki kam katba ki pulit kin pyndep ïa ka jingpynshisha bad sdang ïa ki kam aiñ pyrshah ïa ki suba donkti.
