Shillong, Nailur 05 : Ka Bharatiya Janata Party (BJP) Meghalaya, kala dawa ia ki bor ka ain ba kin ai ka jingpynshitom kat kum ki kyndon ain pyrshah ia u dkhot barim Sanjay Sharma namar ka jingibein ia ka Bible Bakhuid-ka kot ba kyntang jong ki paid khristan.
“Ka jingjia kaba sngewsih ba ibein ia ka Bible Bakhuid kala paw pyrthei dang shen ha ka Jylla jong ngi bad ka BJP Meghalaya ka pangnud ban iohi ia kae ka kam kaba la leh da u briew shimet uba kyrteng u Sanjay Sharma” ong u Bah Mariahom H Kharkrang, Nongaiktien ka BJP.
U Bah Kharkrang ula pynshai ruh ba u Sharjay Sharma um shym la bat kam satia hapoh ka party (BJP) bad u dei uba la ieh nohkam ha ka 8 tarik Jymmang 2026.
“Ka party ka dang tohkit la u dang long ne em u primary member jong ka party bad, lada hooid, kan leh da kaba tyngeh pyrshah ia u” ula ong.
Kat kum ka jingong u Bah Kharkrang, ka BJP ka ju ngeit, leh bad ialap ia ka nongrim ban “burom ia ka jingngeit niam ba laitluid jong ki nongshongshnong” (positive secularism) bad ka jinglong briew ba pura.
“Ka jingburom ia ka jingngeit niam ba laitluid ka dei shibynta jong ka rukom treikam ka BJP, ka lynti kaba la pyni dalade da u Myntri Rangbah Duh ka ka Ri uba ju leit iashimbynta ha ki mass ha man ka miet Khristmas” ula ong.
U ong ba kum kine ki kam ba la leh khlem ka jingkitkhlieh, ka nang pynjah burom ia ka party bad pynbudnam ia u Myntri Rangbah Duh ka ri.
“Ngi kwah ban kren shai ba kum kine ki briew kiba khim ka jingmut jingpyrkhat, kiba don shun ia kiwei ki jaidbynriew, kim don jaka ha ka BJP. Ka jingibein ia ka Bible ka dei ka kam bymman ba shyrkhei kaba syriem kum ka jingpynjulor ia u mot jong u Swami Vivekananda” ula ong.
